Ziortza-bolibartarrei errenta aitorpena euskaraz egiteko gonbidatea egin die udalak
Azpimarratu dute euskaraz egiten den errenta aitorpen bakoitzak "pausu txiki baina sendo bat" suposatzen duela Ogasunaren euskalduntzean. Batzordeko kideek bideo bat egin dute herritarrak kanpainagaz bat egitera animatzeko.
Alicia Rementeria eta Andoni Lariz Kultura Batzordeko kideak, kanpainaren aurkezpenean. Ziortza-Bolibarko Udalak errenta aitorpena euskaraz egiteko gonbitea egin die herritar guztiei. Esan dutenez, euskaraz egiten den errenta aitorpen bakoitzak “pauso txiki baina sendo bat” suposatzen du Ogasunaren euskalduntzean. “Pausu honek daukan garrantzia azpimarratu nahi dugu”, esan dute udal ordezkariek.
Gainerako erakundeek bezala, ogasunak eta ekonomiak ere euskaraz funtzionatu dezaketela esan dute. “Gure eskubidea da zerbitzua euskaraz jasotzea. Beraz, eskubide horretaz baliatu gaitezen eta egin dezagun 2019ko errenta aitorpena euskaraz”. Horretarako, baina, gogorarazi dute herritar bakoitzak errenta aitorpena euskaraz egin nahi duela esan behar diola bankuari.
Iazko datuak. Iaz, adibidez, 192 ziortza-bolibartarrek egin zuten 2018ko erenta aitorpena; 122 herritarrek (%63,5) gaztelaniaz egin zuten eta 70ek (%36,4) euskaraz. “Datuei begiratuta, badago zer hobetu. Gure helburua da gutxinaka horri buelta ematea”. Bide horretan, Uemak abian jarritako kanpaina herritaratu eta bultzatu nahi izan du Kultura Batzordeak. “Herritar guztion indarragaz eta udalen laguntzagaz lortuko dugu gizarteko eremu desberdinetan euskalduntzerako urrats sendoak ematea”.
Herritarrak kanpainagaz bat egin dezaten, Kultura Batzordean parte hartzen duten hainbat herritarrek errenta aitorpena euskaraz egiteko gonbitea egiteko bideo bat ere egin dute. “Guztion indarragaz Euskal Herria eta Ziortza-Bolibar euskaldundu dezagun! Ziortza-bolibartarrok ere errenta aitorpena euskaraz!”.
