Beste positibo kasu bat erregistratu dute Lekeition
Astelehenean beste kasu bat erregistratu eta gero, atzo [ekainak 25] beste bat gehiago antzeman zuten PCR probaren bidez; Bizkai mailan atzo erregistratu zen positibo bakarra izan zen. Pandemia hasi zenetik Lea-Artibai eta Mutriku mailan positibo kasu gehien erregistratu diren herria da Lekeitio.
Eusko Jaurlaritzak gaurko txostenean jaso duenez, atzo [ekainak 25] Lekeition COVID-19agaz kutsatutako beste positibo bat antzeman zuten (astelehenean ere beste bat erregistratu zuten), PCR bidez. Maiatzaren 23tik Lea-Artibain eta Mutrikun positibo berririk antzeman barik zeuden, astelehenera arte [ekainak 22]. Komunikabide batzuek Mutrikun ere positibo kasuren bat erregistratu dutela esan badute ere, Eusko Jaurlaritzak emandako datuen arabera, Mutrikun ez da positibo berririk antzeman. Guztira, pandemia hasi zenetik 105 positibo erregistratu dituzte eskualdean:
- Lekeitio: 27 positibo
- Ondarroa: 24 positibo
- Markina-Xemein: 21 positibo
- Mutriku: 14 positibo
- Berriatua: 6 positibo
- Etxebarria: 4 positibo
- Mendexa: 4 positibo
- Aulesti: 2 positibo
- Ispaster: 1 positibo
- Gizaburuaga: 1 positibo
- Ziortza-Bolibar: 1 positibo
Bestalde, Osasun Sailak emandako datuen arabera, pandemia hasi zenetik, COVID-19agatik 7 herritar hil dira Lea-Artibai eta Mutrikuko osasun eremuetan: 3 Ondarroan, 3 Markina-Xemeinen eta 1 Lekeition.
Lurraldeka, Araban atzo 4 kasu gehiago erregistratu zituzten, Bizkaian bakarra (Lekeitiokoa) eta Gipuzkoan 9.
Bestalde, esan dutenez, amaitu dute Ertzaintzako langileei, suhiltzaileei, udaltzainei, etxeko laguntza zerbitzuko langileei, DYAko profesionalei eta farmaziako langileei probak egiten. “Positiboen ehunekoa test serologikoetan %4tik beherakoa izan da, eta 5 PCR positibo baino ez dira egon. Gainera, maiatzean probak egin ziren arrantza sektoreko langileei eta espetxeetan; azken kasu horretan, proba serologikoetan %1etik beherako intzidentzia antzeman zen, eta ez zen PCR positiborik egon”.
