Karmenetako Zesta-punta txapelketa jokatzen hasiko dira Markina-Xemeingo Unin
Bihar [ekainak 26], 16:45etik aurrera, jokatuko dira txapelketako lehen partidak. Uztailaren 24an izango dira finalak.
Asteburu honetan hasiko da jokoan Markina-Xemeingo Karmenetako Zesta-Punta Txapelketa. Azken urteetan kinielak jokatu dituzte, baina COVID-19ak eragindako geldialdiaren ondoren, jaietarako denbora gutxi geratzen dela eta ohiko partiduak jokatzea erabaki du txapelketa antolatzen duen Markina-Xemeingo Zesta-punta Eskolak.
«Asteburu bi ditugu bakarrik jaiak orduko, asteburu hau eta hurrengoa: ekainak 26, 27 eta 28 eta uztailak 3, 4 eta 5», azaldu du Santi Olabe Markina-Xemeingo Zesta-punta Eskolako entrenatzaile eta Uni pilotalekuko kantxazainak. Hori dela eta, hiru kategoriatan banatu dituzte pilotariak, eta kategoria bakoitzean talde bi osatu dituzte. «A multzoan hiru bikote egongo ziren eta B multzoan beste hiru».
Multzo bakoitzeko pilotariek ligaxka bat jokatuko dute euren artean, kategoria guztietan, eta puntuak batzen joango dira.
Finala, uztailaren 24an izatea aurreikusi dute, eta denek parte hartuko dutela azaldu du Olabek: «Kiniela jokatuko da 24an, eta denek parte hartu ahalko dute. Partiduetan tanto gehien egin dituenak kinielako zenbaki hoberena eskuratuko du, hau da, 1a; puntu gehien lortu dituen bigarrenak 2a, hirugarrenak 3a eta laugarrenak 4a».
Partiduak. Asteburu honetako partiduak zehaztuta dituzte. Bihar [ekainak 26], 16:45etik aurrera txapelketako hiru partida jokatuko dira:
- Txomin-Igotz/Mallagarai-Erkiaga II
- Ansola-Peru/ Janis-Egia II
- Jokin-Elortegi /Ezpeleta-Oinatz
Zapatuan [ekainak 27] beste hiru norgehiagoka egongo dira, 11:30ean hasita:
- Estebe-Peio/ Manex-Ander II
- Burne-Julen/Unax-Kirmen
- Txanton-Arai/Pagaldai-Elosegi
Domekan [ekainak 28], 11:00etan hasiko dira txapelketako partidak. Guztira, lau partida ikusteko aukera egongo da:
- Mallagarai-Erkiaga II/Laia-Ur
- Janis-Egia II/Lur-Guerrero
- Ezpeleta-Oinatz/Erkiaga-Maddi
- Urri-Gardoki/Pagaldai-Elosegi
