Eusko Label Liga eta Euskotren Bandera Lekeitioko uretara helduko dira
Domeka goizean [uztailak 26] lehiatuko dira estropadak. Estropada eremura ez hurbiltzeko deia egiten diete herritarrei zein beste klubetako afizioei.
Lekeitioko estropadaren aurkezpena. Argazkia: Isuntza Eusko Label Ligako eta Euskotren Ligako 8. jardunaldia lehiatuko dira domekan [uztailek 26] Lekeitioko uretan, 35. El Correo ikurriña-Kutxabank Sari nagusie-Lekeitioko Udala eta IX.Euskotren bandera. Gaur [uztailak 22] egin dute aurkezpena Lekeition, udalak eta Isuntza Arraun Elkartekoek, eta Lekeitioko estropada eremura ez hurbiltzeko deia egiten diete herritarrei zein beste klubetako afizioei. “COVID-19 dela eta TKE-Eusko Label ligak eskatuta, ez da ikuslerik izango, eta eremua itxita egongo da”.
Udalerriarentzat kirol jardunaldi garrantzitsua izaten bada ere, aurten ezinezkoa izango da zaleak bertaratzea, azaldu du Koldo Goitia Lekeitioko alkateak. «Egoera honetan guztia hau aurrera eramatea ez da erraza, baina ahal dugun ondoen egiten ahaleginduko gara. Enbarkazioak plazan egongo dira, eta San Juan ere itxita egongo da», azaldu du Santi Zumaran Isuntza elkarteko lehendakariak.
Estropadak goizean lehiatuko dira. Euskotreneko lehiak irekiko du jardunaldia. Hain zuzen ere, 11:40an jarri diete klubei arraunean hasteko ordua. Txanda bakarrean arraun egingo dute Orio Arraunketa Elkarteko, Donostiarra, Donostia Arraun Lagunak eta Hondarribiko traineruek. Ontziek lau kale izango dituzte bi luze eta ziaboga bakarra egiteko.
Emakumezkoen estropada amaitu ondoren, Eusko Label Ligako ontzien txanda izango da. 12:00etan hasiko da ikuskizuna. Domekako jardunaldia izanik, txandak zapatuan jokatuko den Bilboko XI. Banderaren azken sailkapenean oinarrituta egongo direla azaldu dute antolatzaileek. Gizonezkoen txapelketako eskifaiek hiru itsas milia (5.556 metro) osatu beharko dituzte lau luzegaz eta hiru ziabogagaz.
Banderak uretan emango dituztela jakitera eman dute antolatzaileek. Horrez gain, lehiaketako eremu guztietan maskara erabiltzea nahitaezkoa dela gogora ekarri dute.
