Gaztetxoen txapelketako finalak erabakiko dira Markina-Xemeinen
Kategoria bakoitzean kiniela bi jokatuko dituzte, 15 tantora. 16:45ean hasiko da lehenengoa. Ondoren, Xisterako partida bi jokatuko dira.
Iazko Karmen Egunean Uni frontoian jokatu zen zesta-Punta partida. Barikuan amaituko da Markina-Xemeingo gaztetxoen uztaileko zesta-punta txapelketa. Hiru kategoriatan banatuta jokatu dute pilotariek aurten. Azken urteetan kinielak jokatu badituzte ere, COVID-19ak eragindako geldialdiaren ondoren, ohiko partiduak jokatzea erabaki du txapelketa antolatzen duen Markina-Xemeingo Zesta-punta Eskolak. Finalean, ordea, kinielak jokatuko dituzte; 16:45ean hasiko da lehenengoa.
Norgehiagokan parte hartu duten puntista guztiek parte hartuko dute finalean. Txapelketa bi asteburutan jokatu ahal izan dute, eta puntu gehien egin dituzten bikoteak bakarrik jokatu barik, denei aukera ematea pentsatu zuten Markina-Xemeingo Zesta-Punta Eskolakoek. “Txapelketa motz motza izan da, hainbeste denboran barruan egon dira, eta azkenean eurak gozatzea da gure asmoa. Guztiei egiten diete ilusioa, eta, horrela, azkenengo egunean irabazten duena eta puntu gehien egiten dituena izango da txapelduna”.
Ligaxkan tanto gehien egin dituenak izango du, baina, saria; kinielako zenbaki hoberena edukiko du, hau da, 1a; puntu gehien lortu dituen bigarrenak 2a, hirugarrenak 3a eta laugarrenak 4a. Kategoria bakoitzean kiniela bi jokatuko dituzte, 15 tantora.
Finalaren ondoren, Xisterako partida bi ere egongo dira: Arbe-Danel eta Alberro-Zugaitz bikoteek jokatuko dute lehenengoan, eta bigarrenean, Aaron-Uranga eta Zuloaga-Mandagaran neurtuko dira.
FINALAK
1.Kiniela (15 tantura):
Mallagarai-Erkiaga
Miren-Malen
Txomin-Igotz
Estebe-Peio
Laia-Ur
Manex-Ander
2.Kiniela (15 tantura):
Unax-Kirmen
Ansola-Peru
Helena-Erika
Lur-Guerrero
Janis-Egia II
Burne-Julen
3.Kiniela (15 tantura):
Ezpeleta-Oinatz
Txanton-Arai
Pagaldai-Elosegi
Jokin-Elortegi
Erkiaga-Maddi
Urri-Gardoki
