Simon Bolivar museoak ere kanpainagaz bat egin du. Euskara oinarri bezala hartuz, udalerri euskaldunak zer nolako altxorrak diren erakutsi nahi da kanpainagaz
Euskara oinarri hartuta, herri euskaldunen aberastasuna ikusarazteko eta herritarrak zein bisitariak kontzientziatzeko Bertatik Bertara kanpaina egiten ari dira hainbat udalerritan, Uemagaz elkarlanean. Kanpaina ekainaren 19an abiarazi zuten. Eta horretan parte hartzen ari ondoko udalak: Amoroto, Lekeitio, Markina-Xemein, Mutriku, Ondarroa eta Ziortza-Bolibar. Azken horretan, herriko ostalari guztiek bat egin dute kanpainagaz, baita Simon Bolivar museoak ere.
Udal ordezkariek azaldu dutenez, herriko ostalari guztiekin jarri ziren harremanetan, eta kanpainaren berri eman zieten. Azkenean, guztiek bat egin dute kanpainagaz: Muniozguren baserri-taberna, Armola, Ikestei eta Kanpape taberna-jatetxeak, Usandi eta Baketxe aterpetxeak, Monte nekazal etxea, Ziortzako Monasterioko denda eta Simon Bolivar museoa. Hain zuzen ere, herriko establezimendu guztiek kanpainagaz bat egin izana azpimarratu dute udal ordezkariek.
Udazkeneko ekimenak. Kanpaina horren bidez, herritarrei eta bisitariei erakutsi nahi diete udalerri euskaldunak zer nolako altxorrak diren. Bide beretik, pandemiak gogor kolpatuen duen ostalaritzari beste baliabide batzuk ematea ere beste helburuetako bat da, tokian tokiko ekonomia bultzatuz.
Kanpaina ez da soilik udara mugatuko. Izan ere, udazkenean udalerri euskaldunen garapenarekin lotutako hainbat ekimenen egingo dira, tokiko produktuak eta ekonomia sozial eraldatzailea nola lagundu daitezkeen hausnartzeko eta lanerako ildo berriak abiarazteko.
Udal ordezkariak eta Usandi aterpetxeko ordezkariak, Usandi aterpetxearen aurrean, kanpainagaz bat egin dutela adierazten.
