Nekane Murga: "Datuak aztertuta, egonkortze bidean goazela ikusten da"
Birusaren aurrean "ahulak" garela eta positibo kasuak gehitzen ez joateak esfortzu handia suposatzen duela gaineratu du. Oro har, "momentu erabakigarrian" gaudela gaineratu du. "Segurtasun neurriak betetzen jarraitu behar dugu".
Nekane Murga Osasun sailburuak esan duenez, datuek erakusten dute Araba, Bizkaia eta Gipuzkoa “egonkortze bidean” daudela. “Epidemiak gora egiten jarraitzen du, baina modu apalagoan. Positiboen ehunekoa jaisten doa, eta R0 1en azpitik dago. Dena dela, joera aldaketa egon dela ziurtatzeko beharrezkoa da datuak egonkortzea”. Birusaren aurrean “ahulak” garela eta positibo kasuak gehitzen ez joateak esfortzu handia suposatzen duela gaineratu du. “Esperientziak erakutsi digu zelako erraz kutsatzen garen”.
Gaurko kutsatuak martxokoak baino inpaktu gutxiago daukatela ere esan du, baina oraindik orain ospitaleratuta daudenak, bai geletan eta baita ZIUn, oraindik ere asko direla esan du. Oro har, “momentu erabakigarrian” gaudela gaineratu du. “Segurtasun neurriak betetzen jarraitu behar dugu”.
Uztailean eta abuztuan oporretan egon eta gero, herritarren gehiengoa egunerokotasunera itzuliko dela gogorarazi du. Horren aurrean, neurriak betetzen jarraitzeko eskatu du. “Saiatu jende asko dagoen lekuetara ez joaten. Saiatu erosketak jende gutxien dagoen momentuan egiten. Saiatu leku publikoetan dauden elementuak ez ikutzen”.
Mugikortasunari dagokienez, onena oinez edo bizikletaz mugitzea dela gaineratu du. “Dena dela, garraio publikoa erabili behar bada, maskara beti soinean eraman behar da, eta bestelako segurtasun neurriak ere bete”.
