Jose Mari Elordi 'Elorrixa', 80 urte eta mendi tontorretan
80 urtegaz lau tontorren erronka osatu du Jose Mari Elordi Agirrebeitia ‘Elorrixa’-k. Markina-Xemeingo Goiko Portaleko iturritik irten eta Urregarai, Oiz, Urko eta Kalamua mendiak igo ditu.
Horrela nahi zuen, eta horrela egin du. 80 urtegaz (abuztuaren 5ean beteta) lau tontorren mendi buelta osatu du Jose Mari Elordi Agirrebeitia Elorrixa-k. Orain dela hiru urte erabaki zuen bere azken mendi buelta handia 80 urtegaz egitea, eta hala izan da. Markina-Xemein, Urregarai, Oiz, Urko, Kalamua eta Markina-Xemein arteko ibilbidea egin zuen joan den astean, abuztuaren 27an, hain zuzen ere.
Beroa egin zuen egun hartan, baina ondo ibili zela azaldu du Elorrixak. Goiko Portaleko iturritik 07:00etan irten zen, eta 16:10ak aldera bertan zegoen bueltan. Guztira, ibilbidea osatzeko, 9 ordu eta 10 minutu behar izan zituen. «Buzoi denetatik pasatu nintzen», dio. Hala, Urregaraira 08:05ean ailegatu zen, Oizera 10:42an, Urkon zegoen 13:40an, eta Kalamuako tontorrera 14:43an ailegatu zen. «Santa Eufemitik Gontzugaraira joan nintzen hobetoen. Aldapetan nekatu egin nintzen, baina ondo ibili nintzen».
Urregaraira eta Oizera bakarrik joan zen, baina, gero, lagunduta ere egin zituen tarte batzuk: Trabakutik Urkoraino bere seme Iñigo Elordi izan zuen bidelagun, Urkon bere seme Juanjo Elordi eta Intza iloba zain izan zituen animoak emateko, eta Urkotik Markina-Xemeinerainoko azken tartea Juanjo ondoan zuela egin zuen. Amaieran ere harrera beroa egin zioten Elorrixari bere emazte Maribi Bilbaok, Iñigo semeak, Intza ilobak eta Sumiña eta Karia lagunek.
Era askotako probak. Mendizale amorratua dela aitortzen du Elorrixak. «Nahiz eta izerditan ibili, gustura ibiltzen naiz mendian». Medikuak gomendatuta hasi zen ibiltzen, eta ez da geratu. Mendian ibiltzeak mesede itzela egiten diola dio, eta, beraz, COVID-19 pandemiak eragindako konfinamenduan txarto pasatu du. «Otsailetik ari nintzen irteera hau prestatzen, eta irten barik egon behar». Martxa galduta, lehenengo irteera gogorra egin zitzaiola aitortu du, baina berehala jarri zen sasoian berriro.
Euskal Herriko mendi guztiak igo ditu, eta era askotako probak osatu. «Karpeta oso bat beteta daukat egindako martxekin». Horietako bat Ondarroa-Ondarroa iraupen luzeko martxa 8 ordu baino gutxiagotan osatu zuen (7 ordu eta 50 minutu), eta Gorbeiara ostera, Markina-Xemeindik joan eta etorri, 15 ordu eta laurdenetan osatuta dago. Aralarko San Migel eta Markina-Xemeingo San Migel arteko tartea 13 ordu eta laurdenetan egin zuen, eta 24 orduko proba asko ere egin ditu, Gernikakoa, esate baterako. Sei urtez jarraian Hiru Haundiak ere egin zituen, Tolosakoak, Azkoitiko Zazpi Kurutze, Bizkaiari buelta… Elorrixa ibiltariari ez zaizkio falta istorio eta pasadizoak. Donostiako hondartzatik etxera mendiz mendi «bazkalordurako» itzuli zenekoa, esate baterako.
Ibiltzeko gogoa ez zaio amaitu oraindik, baina hemendik aurrera lasaiago jarraituko duela gaineratu du. «Tontor txikiagoetara joango naiz, esate baterako, Santa Eufemira».
