Lekeitioko hainbat taberna eta jatetxe itxita egongo dira Antzar Egunean
Lekeitioko Udalak azaldu duenez, aste osoan neurriak hartu dira herritarren osasun ona bermatzeko, eta momentura arte araudia errespetatzen ari da.
COVID-19aren kutsadura saihesteko helburuagaz ixtea erabaki dute Lekeitioko hainbat taberna eta jatetxek. Irailaren 1ean ere hala egin zuten batzuek, eta Antzar egunean ere erabaki bera hartu dute beste hainbatek.
Egunotan, txoko gastronomiko ugari ere itxita egon direla jakitera eman du Lekeitioko Udalak, “segurtasunez jarduteko helburuarekin eta arriskuak suposatu ditzaketen bazkariak saihestuz”. Lekeitioko Udalak eskerrak eman dizkie guztiei “une honetako egoeraren aurrean hartutako konpromisoagatik eta COVID-19aren hedapena eragin dezaketen egoerak ekiditeagatik”.
Bestalde, Antzar komisioak ere deia egin die azken urteetan Antzar jaian parte hartu duten potinetako taldeei, potinak ez uretaratzeko eta erantzukizuneko jarrera izatea eskatuz.
Udalak azaldu duenez, aste osoan neurriak hartu dira herritarren osasun ona bermatzeko, eta momentura arte araudia errespetatzen ari da. “Zapatuan Antzar eguna izango dugu eta, aurten ez bada ospatuko ere, neurri bereziak hartuko dira jende pilaketak saihesteko”, gogoratu dute. Izan ere, Eusko Jaurlaritzako Segurtasun sailak, Bizkaiko Foru Aldundiko garraio sailak – Bizkaibus, Eusko Jaurlaritzako Garapen eta Azpiegitura saila – Portuetako zuzendaritza eta Eusko Jaurlaritzako Osasun sailak, Lekeitioko Udalarekin batera, segurtasun dispositibo berezia antolatu dute barikurako [irailak 4] eta zapaturako [irailak 5].
Barikuan, ibilgailuen sarrera murriztuko dute arratsalde-gau partean. Udalerrian erroldatutako pertsonak, udalerriko enpresetako langileak edo turismo establezimenduetan erreserbak dituzten pertsonak bakarrik sartu ahalko dira ibilgailuetan. Egun horretan, baina, autobus zerbitzu normala egongo da.
Zapatuan, berriz, sarrerak itxita egongo dira egun osoan, eta debekatuta egongo da udalerrira sartzea. Portua ere itxi egingo dute, eta herri barruko zirkulazioa ere arautuko dute kale batzuk zarratuz. Gainera, ez da egongo garraio publikoko zerbitzurik; lineak ez dira Lekeitiotik irtengo ez lekeitiora helduko.
