Koldo Gezuraga gernikarra izan da nagusi Lekeition jokatu den Udabarria Bertsotan saioan
Atzo [irailak 16] jokatu ziren Udabarria Bertsotan sailkapen faseko lehen saio biak, eta sarrerak agortu egin ziren bietan. Gaur [irailak 17] beste saio bi egongo dira Busturian eta Getxon, eta etzi [irailak 18] Markina-Xemeingo Esperantza aretoak hartuko du bi saioetako bat.
Koldo Gezuraga kantuan Lekeition. Arbazkia: Bizkaiko Bertsozale Elkartea Asier Galarza Garai muxikarra eta Koldo Gezuraga Sejido gernikarra nagusitu dira Orozkon eta Lekeition jokatu diren Udabarria Bertsotan faseko lehenengo saioan. Atzo [irailak 16] jokatu ziren sailkapen faseko lehen saio biak, eta sarrerak agortu egin ziren bietan.
Azkue aretoa izan zuten bilgune atzo Lekeition elkartu ziren bertsozaleek. Sei bertsolari igo ziren oholtzara, tartean Eneko Arrate Sololuze markina-xemeindarra, eta ariketa puntuagarri guztiak egin ostean, Koldo Gezuragak lortu du puntu gehien batzea, 174,5 puntu, hain zuzen ere. Arratek berriz, 158 puntu eskuratu zituen.
Puntuazioak horrela geratu ziren:
-
Koldo Gezuraga Seijido (Gernika-Lumo)………….174,5
-
Peru de Pedro Larrea (Gorliz)…………….167
-
Garikoitz Sarriugarte Onaindia (Zaldibar)..163,5
-
Inazio Vidal Gurrutxaga (Leioa)………….160,5
-
Eneko Arrate Sololuze (Markina-Xemein)……………158
-
Jokin Castaños Gonzalez (Galdames)………145
Amaia Ugalde Begoñak jarri zizkien gaiak bertsolariei. Epaimahaia, ostera, Ander Arrien Aspiazu, Leire Etxebarria Gaztelu eta Mirari Azula Aurrekoetxea lekeitiarrak osatu zuten. Idazkaria Karmele Gisasola Zenikazelaia izan da.
Orozkoko saioa Donibane aretoan izan zen, eta irabazlea 185 puntugaz, Asier Galarza Garai muxikarra. Aitor Ruiz Urizar lekeitiarrak ere kantatu behar zuen saio horretan, baina ezinezkoa izan zuela jakitera eman dute. Bere ordez Janire Arrizabalaga Munduatek kantatu zuen, baina Arrizabalagak ez zuen puntuatu.
Saioan gaiak ematen Oier Iturralde Fernandez Atano aritu zen. Epaimahaia, ostera, Alaitz Etxanobe Bereziartuak, Graxi Arregi Leonardo markina-Xemeindarrak eta Jurgi Fuentes Goikoetxeak osatu zuten, eta idazkari beharretan Itziar Basterretxea Olarreaga aritu zen.
Hurrengo saioak. Beste bi saio egongo dira gaur [irailak 17], Getxon eta Busturian. Getxoko saioa Muxikebarri zentroko Arrigunaga aretoan izango da, 18:30ean. Bertan kantatuko duten bertsolarien artean egongo da Bikain Urkiri Etxebarria ondarrutarra. Busturian, ostera, saioa kultur etxean izango da.
Bihar, berriz, Markina-Xemeingo Esperantza aretoak hartuko du bi saioetako bat. Saio horretan kantatuko duten bertsolariak ondorengoak izango dira:
- Beñat Bilbao Landa (Gernika-Lumo)
- Ibai Amillategi Omaetxebarria (Gernika-Lumo)
- Iñaki Iturriotz Zuluaga (Igorre)
- Irune Basagoiti Agirre (Ermua)
- Mikel Galarza Idirin (Leioa)
- Xabier Enbeita Ibarra (Gernika-Lumo)
Sarrerak Internet bidez lortu ahal izango dira Bertsosarrerak helbidean 3 eurotan, bazkideek 2 euroko prezioan eskuratu ahalko dituzte, eta 16 urtetik beherakoek, doan.
