Bertan behera geratu da Lea-Artibaiko Elikagaien eta Artisauen Eguna
COVID-19aren intzidentzia areagotu egin da azken egunetan Markina-Xemeinen. Bihar [urriak 9] jairik ez dagoela eta arduraz eta erantzukizunez jokatzeko deia egin die udalak herritarrei. 18 PCR positibo egon dira urriaren 1etik 7ra bitartean.
Markina-Xemeingo Udalak gaur [urriak 9] jakitera eman duenez, bertan behera geratu da bihar [urriak 10] egitekoa zen Lea-Artibaiko Elikagaien eta Artisauen Eguneko Azoka. Azken egunetan Markina-Xemeinen COVID-19aren intzidentzia areagotu izanak eraman ditu antolatzaileak erabakia hartzera. “Markina-Xemeingo Osasun Etxearen azken orduko eskaerak eta Ertzaintzaren gomendioek berretsi egin dute erabakia, guztion osasuna bermatu eta aurrera begira sor daitezkeen arazoak ekiditeko“, azaldu dute.
Covid-19ak eragindako egoera dela eta, Urriko Azoka Nagusia bertan behera geratu zen. Urteroko hitzorduaren ordez, formatu txikiago bateko ekimena antolatuta zegoen biharko, Lea-Artibaiko lehen sektorea eta bertako produktuak babesteko. “Ahalegin eta lan handia egin da egoera berezi honetan azoka antolatzeko baina, azken orduko informazioak ikusita, ezin izango da ekimena aurrera eraman”.
Bihar Markina-Xemeinen ez dagoela jairik gogora ekarri die udalak herritarrei eta egoerak eskatzen duen moduan, arduraz eta erantzukizunez jokatzeko deia egin diete.
Eusko Jaurlaritzako Osasun Sailak emandako datuen arabera, irailean 43 positibo egon ziren Markina-Xemeinen, eta 18 positibo egon dira urriko lehen egunetan (urriaren 7ra arte). Martitzenean [urriak 6], esate baterako, 7 positibo erregistratu zituzten.
