Sindikatuen arabera, "jarraipen zabala" eduki du eskola jangeletako grebak
ELA, LAB, CCOO eta UGT sindikatuek deituta, bigarren greba eguna izan dute gaurkoa [urriak 27] eskoletako jangeletako langileek. Eguenean [urriak 29] egingo dute hurrengoa.
Ondarroako Zubi Zahar herri ikastolako langileek gaur [urriak 27] egindako elkarretaratzea. Eskoletako jangeletako langileek, kaleak hartu, eta greba egin dute gaur [urriak 26] bigarren aldiz. Segurtasuna, enplegua eta lan baldintzak bermatzeko eskatuz, hilaren 21ean izan zuten lehen greba eguna, eta hurrengoa ere zehaztua dute: eguenean [urriak 29] egingo dute. Oraingoz, hori izango da azken greba.
Sindikatuen arabera, lehen greba egunak %60ko erantzuna izan zuen, eta gaurkoak [urriak 27] ere «erantzun zabala» izan duela nabarmendu dute. Hala ere, salatu dute grebarako «hainbat eragozpen» jarri dituztela Eusko Jaurlaritzako Hezkuntza Sailak eta enpresa azpikontratatuek. Gutxieneko zerbitzuei dagokienez, ELAk nabarmendu du «balorazio interesduna» egin dutela eta helburu bakarra izan dutela: ez uztea ikusten eskoletako jangeletako «benetako egoera eta langileen eskaerak».
Atzo Eusko Jaurlaritzak ezarritako neurriek eragina izan dute sindikatuek deitutako protestetan ere. Arabako, Bizkaiko eta Gipuzkoako hiriburuetan zituzten antolatuak elkarretaratzeak, baina, herritik ateratzeko debekua dela eta, joan ezin zirenei ikastetxeen aurrean protestak egiteko eskatu diete.
