Ostalaritza itxi eta mugikortasuna gehiago mugatu du Jaurlaritzak
Etxeratze agindua ere ordubete aurreratu dute; 22:00etatik 06:00etara pertsonen zirkulazioa mugatuta egongo da. Neurriak zapatuan sartuko dira indarrean [azaroak 7], eta azaroa osoan egongo dira indarrean. Lehendakariak esan du ezinbestekoa dela neurri berriak hartzea eta ezinbestekoa dela orain egitea.
Josu Erkoreka lehen lehendakariordea, Iñigo Urkullu Lehendakaria eta Gotzone Sagardui Osasun sailburua, LABIren bileran. Argazkia: Irekia Euskadiko Babes Zibileko Planaren (LABI) bilera egin da gaur [azaroak 5]. Horretan, astelehenetik aurrera [azaroak 9] indarrean egongo diren neurri murriztaile gehiago ezartzea adostu dute Iñigo Urkulluk eta batzordeko gainerako kideek, “ezinbestean”. Neurri berriak azaroa osoan egongo dira indarrean. Neurri berriak:
- Pertsonen mugikortasuna mugatuta egongo da 22:00etatik 06:00etara. Sanchezek etxeratze agindua 22:00ak baino lehen ezartzea onartu ez dionez, indarrean dagoen legeari jarraituz, etxeratze agindua ordubete aurreratzea adostu dute.
- Jarduera sozioekonomikoak (merkataritza establezimendu guztiak): Jarduera sozioekonomikoak 21:00etatik aurrera itxita egon beharko dute. Neurri horrek merkataritza establezimendu guztiei eragingo die, farmaziei eta gasolindegiei izan ezik.
- Ostalaritza eta jatetxeak: Itxita egon beharko dute. Kanpoan geratzen dira hoteletako eta beste ostatu batzuetako jantokiak, egoiliarrei zerbitzua emateko. Jatorduak etxez etxe prestatu eta zerbitzatu ahal izango dira, aldez aurretik hitzordua eskatuta, 21:00ak arte. Neurri honetatik kanpo geratzen dira gasolindegietan, osasun zentroetan, zentro soziosanitarioetan, eskola jantokietan, lantegi eta jantoki sozialetako zerbitzu guneetan sartzen diren jatetxe zerbitzuak.
- Kultu jarduerak: aforoa %35ekoa izango da, eta 21:00etako amaitu beharko dira. Profesionalak ez diren musika eta ahots entsegu kolektiboak edo dantza entsegu kolektiboak bertan behera geratzen dira.
- Kultura ikuskizunak: 21:00ak baino lehen amaitu behar dira.
- Taldeko kirol jarduerak: Taldeko edozein kirol jarduera etetea adostu dute, lehiaketa profesionala edo erdi profesionala izan ezik. Debekatuta dago kirol ekitaldietara joatea. Nahitaezkoa da maskara erabiltzea jarduera fisikoa edo kirola hiri edo herri inguruneetan egiten denean.
- Joko eta apustu establezimenduak: itxita egon beharko dute.
- Garraio publikoa: 22:30ak izango dira lurralde historikotik ateratzeko gehieneko ordutegia. Salbuetsita dago taxia edo gidaria duen ibilgailuaren alokairua.
Iñigo Urkulluk esan du datuak kezkagarriak direla: “Datuak ez dira lasaigarriak. Gure inguruan, birusaren transmisioa gero eta handiagoa da. Egoera gero eta kezkagarriagoa da. Ospitaleetan ere egoera okertzen ari da. Ospitaleak kolapsatzeko moduan ez badaude ere, hori mehatxu bat da. Ezinbestekoa da transmisioa eteteko neurri berriak hartzea eta ezinbestekoa da orain egitea”. Gaineratu dutenez, neurri berriak “beste konfinamendu bat saihesteko” hartu dituzte.
Laguntzak. Lehendakariak gaineratu du LABIren barruan pandemiak eragindako sektoreentzako laguntza-ildoen balorazio bat partekatu dela; merkataritzaren, ostalaritzaren eta turismoaren arloko laguntzak aztertu dituzte. Eusko Jaurlaritzak laguntza-programa guztiak indarrean mantentzen dituela gogorarazi du, eta kaltetutako sektoreekin zuzeneko harremanetan jarraituko dugu, planteatzen diren beharrei hobeto erantzuteko.
