Azken asteetako intzidentzia mailarik baxuena erregistratu dute Lea-Artibain
Azken 24 orduetan 7 positibo berri erregistratu dituzte Lea-Artibain eta Mutrikun: Mutriku (3), Lekeitio (2) eta Ondarroa (2). HITZAren eremuan, Mutriku da azken egunetan intzidentzia maila altua edukitzen ari den herria. Lea-Artibain, ostera, atzo azken asteetako inoizkorik positibo gutxien erregistratu zituzten.
Atzo [azaroak 18] 7 positibo berri erregistratu zituzten Lea-Artibain eta Mutrikun: Mutriku (3), Lekeitio (2) eta Ondarroa (2). Datu horien aurrean, Lea-Artibain atzo [azaroak 18] inoizkorik intzidentzia mailarik baxuena erregistratu dute; positiborik erregistratzen ez duten herriak gero eta gehiago dira. Mutrikun, baina, kasu berriak atzematen jarraitzen dute, eta 100.000 biztanleko 993,63ko tasa dauka. Lekeitiogaz batera, gune gorrian egoten jarraitzen du. Dena dela, Lekeitiok daukan tasa egunez egun jaisten doa (607,27ko tasa erregistratu zuten). Eta nahiz eta Ondarroari 500era heltzeko gutxi falta, atzo herenegun baino tasa baxuagoa erregistratu zuten (419,09).
Azken hiru egunetan, esaterako, Lea-Artibai mailan kasu berririk erregistratu ez duten herriak ondokoak dira: Amoroto, Aulesti, Berriatua, Etxebarria, Gizaburuaga, Ispaster, Markina-Xemein eta Ziortza-Bolibar.
Lurraldeka. Araban, Bizkaian eta Gipuzkoan atzo [azaroak 18] 14.886 proba egin zituzten, eta horietatik 1.069 positibo erregistratu zituzten (%7,2): Gipuzkoan 478 kasu atzeman zituzten, 432 Bizkaian eta 136 Araban. Horiei EAEn erroldatuta ez dauden herritarren artean atzemandako beste 23 kasu gehitu behar zaizkie.
Ospitaleratutakoen kopuruak ere behera egin du: atzo [azaroak 18] 477 pertsona zeuden ospitaleetan (herenegun baino 8 gutxiago). Eta horietatik 133 ZIUn zeuden (herenegun baino 4 gutxiago).
