Eusko Jaurlaritzak neurri murriztaileak mantentzea erabaki du, "eraginkorrak izaten ari direlako"
Esan dute Batzorde Teknikoak babesten duen erabakia dela, eta horrek berresten duela hartutako neurriak "egokiak eta egoera epidemiologikoaren larritasunaren araberakoak" izan direla. Dekretua barikuan [azaroak 20] argitaratuko da, eta zapatuan [azaroak 21] sartuko da indarrean.
LABIren Aholku Batzordea batu da gaur [azaroak 19], eta horretan onartu dute azaroaren 6an ezarritako neurri murriztaileak bere horretan mantentzea. Gotzone Sagardui Osasun sailburuak adierazi duenez, “neurriak eraginkorrak izaten ari diren arren, EAEk birusaren transmisio oso altuko egoeran jarraitzen du”. Agintariek, beraz, mugikortasuna eta gizarte harremanak ahalik eta gehien murrizten jarraitzearen alde egin dute.
Dekretua barikuan [azaroak 20] argitaratuko da Euskal Herriko Agintaritzaren Aldizkarian eta zapatuan [azaroak 21] sartuko da indarrean. Luzapena abenduaren 12ra arte egongo da indarrean.
Esan dute Batzorde Teknikoak babesten duen erabakia dela, eta horrek berresten duela hartutako neurriak “egokiak eta egoera epidemiologikoaren larritasunaren araberakoak” izan direla. “Neurriak eragin positiboa edukitzen ari dira, eta hori azken egunetako datuen joera aldaketan ikusten da. Gizartearen gehiengoaren erantzun ona faktore erabakigarria izan da horretarako”, esan du Sagarduik.
Bestalde, jakinarazi du erlaxazio egoerari aurre egitea helburu duen sentsibilizazio kanpaina bat abiarazi dela, euskal erakunde guztien babesarekin. “Kanpaina horrek gogoraraziko du birusak ZIUra edo heriotzara eraman ahal duela”. Kanpainaren leloa ondokoa da: Eskuak, maskara, distantzia. Denok dakigu nola saihestu.
