Antzerki jardunaldiak antolatu ditu Mutrikuko Udalak, "kutsatuen tasak hobera egin duelako"
Abenduaren 5etik 8ra egongo dira antzezlanak, 18:00etan, kiroldegian. Sarrerak Turismo Bulegoan eta Mutrikuko Udalaren webgunean egongo dira salgai, asteleheneko [azaroak 30] 10:00etatik aurrera; herritar bakoitzak gehienez ere bi sarrera erosi ahalko ditu.
Iazko antzerki jardunaldietan 'Txarriboda' ikusteko aukera egon zen. Azken momentuan, herriko antzerki taldeko kideek ere parte hartu zuten emanaldian. Mutrikuko Udalak urtero antolatzen du azaroan Antzerkiaz Blai antzerki jardunaldia. Aurten, baina, abenduan egitea erabaki dute, “azaroan herrian zeuden positibo kopurua handia zelako eta 100.000 biztanleko tasa ia 1.000ra heltzen zelako”. Baina azken egunetan datuek hobera egin dutela iritzita, jardunaldiak abenduan egitea erabaki dute. “Osasun larrialdian Mutrikuko Udalak kultura eta kultur ekitaldien aldeko apustuarekin jarraitzen du, herritarrekin eta kulturgileekin pentsatuz”. Arrazoi horiek tarteko, abenduaren 5etik 8ra ospatuko da aurten Antzerkiaz Blai.
Lau egunez, beraz, antzerkiaren plaza bilakatuko da Mutriku. “Lau egun eta punta puntako lau antzezlan edukiko ditugu”. Emanaldi guztiak kiroldegian izango dira, 18:00etan. Eta segurtasun neurri guztiak beteta egingo direla gaineratu dute. Aurten, gainera, sarrerak Turismo Bulegoan salgai egoteaz gain, Internet bidez ere erosi ahalko dira, orain arte ez modura; Mutrikuko Udalaren webgunean erosi ahalko dira, agendaren atalean. Astelehenetik aurrera [azaroak 30] egongo dira salgai, 10:00etatik aurrera, 4 eurotan.
Emanaldi bakoitzeko 128 sarrera egongo direla diote: “32 sarrera Turismo Bulegoan salduko dira, eta gainerakoak Internet bidez”. Pertsona bakoitzak gehienez ere bi sarrera erosi ahalko dituela esan dute, bai Internetez eta baita ere Turismo Bulegoan.
ANTZELANAK:
- Abenduak 5 (18:00etan, kiroldegian): Porno Vs. Afrodita (Edo I love GorkaUrbizu). 14 urtetik gorakoei zuzenduta. Iraupena: 70 minutu.
- Abenduak 6 (18:00etan, kiroldegian): Matriuska (Ttak Teatroa+Kamikaz Kolektiboa). Helduei zuzenduta. Iraupena: 45 minutu.
- Abenduak 7 (18:00etan, kiroldegian): Erlauntza (Vaiven Produkzioak). Helduei zuzenduta. Iraupena: 70 minutu.
- Abenduak 8 (18:00etan, kiroldegian): Ez dok hiru (Tartean Teatroa). Publiko guztiei zuzenduta. Iraupena: 70 minutu.
