Zortzi ekitaldi dakartza Ondarroako abenduko egitarauak
Barre Algaraka bakarrizketa saioa eskainiko dute bost aktore ondarrutarrek, abenduaren 20an; bi saio eskainiko dituzte. Bestetik, Pirritx, Porrotx eta Mari Mototsen ikuskizuna ('Amaren Intxaurrak') ere abenduan izango da, eta ez urtarrilean. Sarrerak eta gonbidapenak Turismo Bulegoan hartu behar dira, martitzenetik domekara, 12:00etatik 14:00etara eta 17:00etatik 19:00etara.
Ezkerretik eskumara: Aritza Aristondo kultur zinegotzia, Nerea Gartzia aktorea, Zunbeltz Bedialauneta alkatea, Fede Badiola aktorea, Nagore Badiola kirol zinegotzia eta Ainhoa Etxebarria aktorea. Argazkia: Udalbarriak. Ondarroako Udalak Gabonei begirako kultur ekitaldi sorta prestatu du; abendu osorako zortzi kultur ekitaldi iragarri dituzte. Aritza Aristondo Natxiondo Kultura zinegotziaren esanetan, “herritarrek kulturaz gozatzeko aukera edukitzeko” prestatu dute egitaraua: “Orain arte udalak antolatutako ekintza ia guztietan aforoa bete da, eta hori jendeak kultura gosea duen seinale da. Abenduko egitarauak bide horri jarraipena eman nahi dio”.
Sarrerak. Sarrerak eta gonbidapenak Turismo Bulegoan hartu behar dira, gaurtik [azaroak 27] aurrera. Turismo Bulegoaren ordutegia ondokoa da: martitzenetik domekara, 12:00etatik 14:00etara eta 17:00etatik 19:00etara. Pertsona bakoitzak gehienez ekitaldi bakoitzeko 5 sarrera erosi ahalko ditu. Udalak gogorazi du protokolo berriak direla-eta sarrerak erosterakoan ekitaldira joango diren pertsonen izen-abizenak eta telefono zenbakia eman behar direla Turismo Bulegoan, “zerbait gertatuko balitz ahalik eta arinen ekitaldi bakoitzean zein egon den zehatz jakiteko”. Sarrerak hartzeko lehenengo egunean, gaur [azaroak 27], jende ilara luzea sortu da [beheko argazkian].
Ekitaldien artean dago bost aktore ondarrutarrek eskainiko duten Barre Algaraka bakarrizketa saioa. Fede Badiolak zuzenduta eta Asier Ituarte, Jabi Ituarte eta Josu Eizagirreren kolaborazioagaz, ondoko aktoreak ariko dira bakarrizketak eskaintzen: Fede Badiola, Ainhoa Etxebarria, Iñaki Maruri, Aitor Artetxe eta Nerea Gartzia. “Aste Santuan bakarrizketa saioek eduki zuten arrakasta ikusirik, garbi geneukan Gabonetako ekitaldi bat hori izango zela”. Ekitaldi horrek jende ugari erakartzea espero dute, eta horregatik antolatu dituzte bi saio: 17:00etan eta 19:30ean. Sarrerak saltzen hasi direnean, baina, segituan agortu dira, eta hilaren 21ean ere beste bi saio eskainiko dituztela esan dute.
EKITALDIAK:
- Abenduak 13, domeka. Pirritx, Porrotx eta Marimotots: Amaren intxaurrak ikuskizuna. Bi saio: 16:00etan eta 19:00etan. Sarrera 5€. Oharra: ikastetxeetan izena eman behar da (izena emateko azken eguna: azaroak 26). Aforoa gaindituz gero, zozketa bidez esleituko dira sarrerak. Sarrerak soberan geratuko balira, salgai jarriko lituzkete.
- Abenduak 18, barikua. Kirol Gala: 2019ko Kirol Sarien banaketa ekitaldia, 19:00etan, Kofradia Zaharrean. Aforoa mugatuta dagoenez, gonbidapenak behar dira. Sarituak: Nerea Badiola eta Amaia Galdos arraunlariak, Inhar Urruzuno harrijasotzailea eta Aurrera Mendi Taldeko eskalada taldea. Aipamen Berezia Aitor Aulestiari egingo zaio. “Ez da beste urteetakoa bezalako ekitaldia izango; motzagoa izango da”.
- Abenduaren 18tik urtarrilaren 10era. Euskal Herriko Animazioaren Erakusketa (1980-2004), Udal Erakusketa Aretoan. Ordutegia: astegunetan 18:30etik 21:00etara, eta asteburu eta jai egunetan 12:00etatik 14:00etara eta 18:30etik 21:00etara.
- Abenduak 20, domeka (sarrerak agortuta). Barre algaraka bakarrizketa saioak (17:00etan eta 19:30ean), Bide Onera zinema aretoan. Aktoreak: Ainhoa Etxebarria, Aurori Badiola, Fede Badiola, Ferlan eta Nerea Gartzia. Sarrerak Turismo Bulegoan: 5€.
- Abenduak 21, astelehena (errepikapena). Barre algaraka bakarrizketa saioak (17:00etan eta 19:00etan –19:30eko saiorako sarrerak agortuta–), Bide Onera zinema aretoan. Sarrerak Turismo Bulegoan: 5€.
- Abenduak 23, eguaztena. Radixu Irratiaren (105.5FM) Azken Mohikanoak irratsaio berezia, 22:00etan: Euskal Herriko Animazioaren Erakusketa eta Black is Beltza.
- Abenduak 26, zapatua. Black is beltza pelikula, 19:00etan, Bide Onera zineman. Sarrerak Turismo Bulegoan: 3€.
- Abenduak 27, domeka. Bi urte, lau hilabete eta egun bat dokumentala, 19:00etan, Bide Onera zineman. Sarrerak Turismo Bulegoan: 3€. Oharra: Lander Garro zuzendariak egingo du dokumentalaren aurkezpena.
- Abenduak 28, astelehena. Sitio distinto dokumentala, 19:00etan, Bide Onera zineman. Sarrerak Turismo Bulegoan: 3€.
