2021eko udal aurrekontuei ekarpenak egiteko tartea zabalik daukate lekeitiarrek

Lekeitioko Udalak 2021eko aurrekontuen inguruan herritarren iritziak eta ekarpenak jasotzeko prozesua zabaldu du aurten ere. Parte hartze orri bat bete eta udal bulegoetan aurkeztu behar da.

Eider Mugartegi

Lekeitio

2020/12/01

Lekeitioko Udala hasi da 2021 urteko aurrekontuak diseinatzen, eta herritarren lehentasunak ezagutzeko parte hartze prozesu bat jarri du martxan. Horretarako, herritarrek Udaletik aldizkariagaz batera etxeetan jaso duten partehartze orria bete eta udaletxean, kultur etxean edo kiroldegian aurkeztu dezakete. Udalaren webgunean ere aurkitu daiteke parte hartze orria.

Udalak azaldu duenez, COVID-19 pandemiak eragin handia eduki du 2020an, osasun eta krisi ekonomiko egoera larria ekarriz, eta aurrekontuetan ere nabaritu da eragin hori. “Inbertsio eta programa batzuk atzeratu behar izan dira lekeitiarren oinarrizko beharrizanei erantzuna emateko, eta 2021 urtea ere ez da ekonomikoki askoz hobea izango”. Hori dela eta, udaleko aurrekontuetan lehentasunak zehaztu beharko direla esan dute: “egoera honi aurre egiteko eta, nola ez, inor atzean ez uzteko”.

Egoera ekonomikoa. 2020 urterako aurreikusita zeukaten aurrekontua 8.559.151 eurokoa zen, baina pandemiak eragindako krisiaren ondorioz udalaren diru sarrerak ere murriztu egin direla argitu dute. “Guztira, udalak Bizkaiko Foru Aldunditik jasotzen duen dirutik 935.000 euro gutxiago hartu ditu, eta udalak kudeatzen dituen beste tasa eta zergek izandako beherakada 237.000 eurokoa izan da. Ondorioz, Udalak guztira 1.172.000 euro gutxiago izan du 2020 urtean”.

Bestalde, pandemiaren eraginez, beste gastu batzuk sortu direla zehaztu dute: gizarte larrialdietarako diru-laguntzak, Gurutz Gorriarekin hitzarmena, diru laguntzak merkataritza eta ostalaritzari, bonu dendak, garbiketa bereziak kaleetan, eskoletan eta udal instalakuntzetan, udalak kontratatuta dituen enpresen kostuak, gizarte zerbitzuetako eta udaltzain lanetarako errefortzuak, herritarrentzako arreta zerbitzu berria Barandiaran aretoan kokatzeko baliabideak eta abar. Hori guztiori aurrera eramateko 250.000 euro gehiago behar izan dituztela jakinarazi dute.

Datorren urteko aurrekontuaren lehentasunak politika sozialak, garapen ekonomikoa eta herriko ekonomia suspertzea izan behar direla dio udalak, baina herritarren lehentasunak ere jakiteko, euren proposamenak bidaltzeko eskaria luzatu diete.