Aurten ere badago Kontzezioko Bertso Jaialdia Markina-Xemeinen
Sarrerak agortuta daudela jakitera eman dute antolatzaileek. Punta-puntako sei bertsolarik egingo dute kantuan.
Kontzezioko Bertso Jaialdiak ez du hutsik egingo aurten ere. Jaialdiagaz aurrera egitea erabaki dute Amaiur elkartekoek, eta urtero modura sei bertsolari aterako dira Markina-Xemeingo frontoi nagusiko oholtzara: Nerea Ibarzabal, Unai Iturriaga, Maialen Lujanbio, Andoni Egaña, Amets Arzallus eta Miren Amuriza.
Bertsolari guztiek ezagutzen dute Kontzezioko jaialdia. Batzuk gehiago beste batzuk gutxiago, denak egonda daude Markina-Xemeingo jaialdian. Egañak esate baterako urte pila daramatza Kontzezioan kantuan. Are gehiago, gai jartzaile lanetan ere aritu izan da, eta bi omenaldi ere egin dizkiote bere baitan Zarauzko bertsolariari. Lujanbio ere sarritan egon da, bai eta Iturriaga ere, eta azken urteetan Arzallus ere ez da falta izan. Miren Amuriza eta Nerea Ibarzabal markina-xemeindarrak ere errepikatu egingo dute. Debuta egingo duen bakarra, beraz, Maite Berriozabal gai jartzailea izango da.
Berriztarra 16 urtegaz hasi zen bertso munduan gai jartzaile lanetan; eta ordutik, BBK sariketan, Bizkaiko bertsolari txapelketan eta beste hainbat plazako saioetan aritu izan da lan horretan.
Sarrerak. Saio handiekin gozatu ahal izan dituzte bertsozaleek Uni pilotalekuko frontoiko harmailetan jarrita. Urtero bete beterik egoten dira harmailak, aurten, berriz, lekuak mugatuta egongo dira COVID-19 pandemiaren aurreko segurtasun neurriak betez. Hori dela eta, sarrerak aldez aurretik eskuratu behar izan dira, baina antolatzaileek jakitera eman dutenez, agortu dira denak.
Aldaketa bakar hori izango du jaialdiak. Ordua urteroko bera izango da; 17:30ean hasiko da Kontzezioko Bertso Jaialdia, eta berogailua ere egongo da saioa goxo-goxo jarraitu ahal izateko. Eta, urtero modura, bertsozaleak asetzea izango du helburu, jaialdi handi bat eskainiz.
Bertan egunean, 16:00etan zabalduko dituzte ateak, pixkanaka-pixkanaka frontoiko lekuak betetzen joateko.
