Mendexan egingo duten 'Txiki handia zara' emanaldirako sarrerak erreserbatu egin behar dira
Ikuskizuna abenduaren 13an eskainiko dute, frontoian. Sarrerak udaletxean erreserbatu behar dira. Goi-Alde Mendexako 3. Adinekoen Elkarteak belaunaldien arteko harremanak sendotzeko helburuagaz antolatu du ekitaldia.
Txiki handia zara emanaldi magikoa egingo dute abenduaren 13an [domeka], Mendexako frontoian. Doako ekitaldia bada ere, sarrerak udalean erreserbatu behar dira. Telefonoz erreserbatzeko 94-684 21 06 zenbakira deitu behar da.
Aste honetan [azaroaren 30etik abenduaren 4ra] mendexarrek erreserbatu behar dituzte sarrerak, eta lekurik geratuz gero, datorren astean udalerrikoak ez direnek. Izan ere, aforo mugatua daukate; frontoian gehienez 102 pertsona sartu ahalko dira.
Mendexan bizi den Iñigito Txapelpunk artista, abeslari eta musikariak argitaratu berri duen Euskal Herri Magikoa bildumaren Gabonetako Ipuinak lehen liburu musikatuagaz gozatuko dute bertaratzen direnek, eta liburuak sinatzen ere ariko da. Iñigitogaz batera egongo da Andrea Covadonga aktorea. Ezustekoren bat ere egongo dela aurreratu dute.
Belaunaldien arteko harremanak sendotzeko eta bultzatzeko helburuagaz, Goi-Alde Mendexako 3. Adinekoen Elkarteak antolatu du, udalaren laguntzagaz. “Iazko abenduan talo tailerra egin genuen eta jende pila bat etorri zen. Aurten halakorik egin ezin denez, ekitaldi hau egitea pentsatu genuen. Bizi dugun egoera nahikoa tristea da, eta poztasun apur bat behar dugu. Herrian giro pixka bat egoteko ondo etortzen dira halako gauzak”.
