Argiztapen sistema berria jarri dute Markina-Xemeingo frontoi bitan
Sakatzeko botoi bidez kontrolatutako argia egongo da herriguneko frontoi txikian eta Barinagako frontoian.
Barinagako frontoia. Argazkia: Markina-Xemeingo Udala Sakatzeko botoi bidez kontrolatutako argia jarri du Markina-Xemeingo Udalak herriguneko frontoi txikian eta Barinagako frontoian. Horrela, frontoia erabili nahi duenak, botoia sakatu eta argia piztuko du.
Argiztapenak ordubeteko autonomia izango du; hau da: ordubete iraungo du, sakatzen denetik itzaltzen denera arte. Ordubetea gaindituta, instalazioak erabiltzen jarraitu nahi izanez gero, berriro sakatu beharko da botoia, frontoia berriro argiztatu dadin.
Azaldu dutenez sistema hori 08:00etatik 22:00etara egongo da martxan. Beraz, 22:00etatik aurrera eta 08:00ak bitartean, argiak ez dira piztuko, pultsagailuari eman arren.
Zerbitzuaren erabilpen arduratsua eskatu du udalak, “argia frontoia erabiltzen denean eta beharrezkoa denean piztea” eskatu dute.
Bestalde, hemendik aurrera, Barinagako frontoia erabiltzeko ez dela udaletxean txandarik hartu beharko jakitera eman du udalak. Hori bai, kirol instalazioen erabilera osasun egoerak baldintzatuta dagoela ekarri dute gogora.
