Azken orduetan 20 kasu berri erregistratu dituzte Lea-Artibai eta Mutrikun
Gaurko [urtarrilak 19] txosten epidemiologikoaren arabera, ondoko herrietan erregistratu dituzte kasu berriak: 7 Markina-Xemeinen, 5 Lekeition, 4 Mutrikun, 2 Ondarroan eta bana Munitibarren eta Ziortza-Bolibarren. Datozen orduetan azken egunetako joerak bere horretan jarraituz gero, Gizaburuaga eta Munitibar ere perimetralki itxita geratuko lirateke.
Azken orduetan 20 positibo berri erregistratu dituzte Lea-Artibai eta Mutrikun: 7 Markina-Xemeinen, 5 Lekeition, 4 Mutrikun, 2 Ondarroan eta bana Munitibarren eta Ziortza-Bolibarren. Lekeition, esaterako, nahiz eta positibo berriak erregistratu, intzidentzia tasak behera egin du. Bestelako egoeran dago Markina-Xemein; egunez egun intzidentzia tasa igotzen doa.
Datozen orduetan azken egunetako joerak bere horretan jarraituz gero, bihar [urtarrilak 21] Jaurlaritzak argitaratuko duen txostenean eremu gorrian egongo lirateke ondoko herriak: Gizaburuaga, Lekeitio, Markina-Xemein, Munitibar eta Ziortza-Bolibar. Hau da, gaur gaurkoz perimetralki itxita dauden herriei Gizaburuaga eta Munitibar gehituko litzaizkie.
Momentuz, ondokoa da herriz herriko intzidentzia tasa:
- Amoroto: 240,96
- Aulesti: 0
- Berriatua: 238,66
- Etxebarria: 402,68
- Gizaburuaga: 1.000
- Ispaster: 134,41
- Lekeitio: 802,55 (azken orduetan ia 40 puntu jaitsi da)
- Markina-Xemein: 1.054,73 (azken orduetan ia 100 puntu igo da)
- Mendexa: 0
- Munitibar: 1.310,04 (azken orduetan ia 300 puntu igo da)
- Mutriku: 319,91
- Ondarroa: 303,49
- Ziortza-Bolibar: 1.366,74 (azken orduetan ia 200 puntu igo da)
Egoera, “kezkagarria”. Gabonen ostean, etengabe ari da handitzen positiboen kopurua, eta agintariak egoera “kezkagarria” dela ari dira esaten behin eta berriro. Eusko Jaurlaritzak eta Nafarroako Gobernuak emandako datuen arabera, atzo 1.246 positibo atzeman zituzten Araban, Bizkaian eta Gipuzkoan; azken bi hilabeteetako daturik okerrena dela diote.
Horren aurrean, Labiren bilera aurreratzea erabaki dute. Izatez datorren astean ziren batzekoak, baina barikuan [urtarrilak 22] batuko direla esan dute. Komunikabide ezberdinek esan dutenez, litekeena da neurri murriztaileagoak ezartzea. Aurreratu dutenez, etxeratze agindua aurreratu ahal dute, besteak beste.
