Munitibar eta Gizaburuaga ere itxi egingo dituzte, gutxienez martitzenera arte
Markina-Xemeinek, Lekeitiok eta Ziortza-Bolibarrek eremu gorrian egoten jarraitzen dute, eta, ondorioz, Munitibarrek eta Gizaburuagak bezala, perimetralki itxita egoten jarraituko dute. Azken orduetan 34 positibo berri erregistratu dituzte Lea-Artibai eta Mutrikun. Kasu berri gehien Markina-Xemeinen eta Mutrikun erregistratu dituzte.
Gaur arte itxita egon diren Lea-Artibaiko herriei beste bi gehitu zaizkie: Gizaburuaga eta Munitibar. Gizaburuagak 1.500eko intzidentzia tasa dauka, eta Munitibarrek 1.965,07koa. Munitibarren, gainera, azken orduetan 600 puntu igo da intzidentzia tasa, hiru kasu berri erregistratu dituztelako. Jaurlaritzak gaur [urtarrilak 21] argitaratu duen txosten epidemiologikoak berretsi du Markina-Xemeinek, Lekeitiok eta Ziortza-Bolibarrek eremu gorrian egoten jarraitzen dutela; azken egunetan Markina-Xemeingo intzidentzia tasa nabarmen ari da igotzen. Bide beretik, azken egunetan Mutrikuko tasak eduki duen goranzko joera nabarmena ere aipatzekoa da.
Beraz, lehendik ere perimetralki itxita zeuden herriak kontuan hartuta, bihartik aurrera [urtarrilak22] 5 dira Lea-Artibain eremu gorrian dauden herriak: Lekeitio, Markina-Xemein, Ziortza-Bolibar, Munitibar eta Gizaburuaga. Perimetralki itxita egoteaz gain, herri horietako ostalaritza establezimenduak ere itxita egon beharko dute, gutxienez martitzenera arte. Izan ere, Jaurlaritzak astelehenean [urtarrilak 25] argitaratuko du txosten berria, eta hurrengo egunean sartuko da indarrean. Gainera, gogorarazi behar da Jaurlaritzak gune gorrian dauden herrientzako ezarritako neurri bereziez gain, Lekeitiok eta Markina-Xemeinen neurri murriztaileagoak dituztela indarrean.
Kutsatu berriak. Azken 24 orduetan COVID-19arekin kutsatutako 34 kasu berri erregistratu dituzte Lea-Artibai eta Mutrikun: 12 Markina-Xemeinen, 6 Mutrikun, 4 Lekeition, hiruna Munitibarren, Ondarroan eta Ziortza-Bolibarren, eta bana Amoroton, Mendexan eta Gizaburuagan.
Momentuz, ondokoa da herriz herriko intzidentzia tasa:
- Amoroto: 481,93
- Aulesti: 0
- Berriatua: 238,66
- Etxebarria: 402,68
- Gizaburuaga: 1.500
- Ispaster: 134,41
- Lekeitio: 802,55
- Markina-Xemein: 1.213,93 (azken orduetan ia 200 puntu igo da)
- Mendexa: 0
- Munitibar: 1.965,07 (azken orduetan ia 600 puntu igo da)
- Mutriku: 432,82 (azken orduetan ia 100 puntu igo da)
- Ondarroa: 338,51
- Ziortza-Bolibar: 2.050,11 (azken orduetan ia 700 puntu igo da)
Hemen Araba, Bizkaia eta Gipuzkoan gune gorrian dauden herrien zerrenda:
