Mutrikuko Arrietakua jauregira bisita gidatua egingo dute
Geoparkeak antolatuta, bisita gidatua zapatuan [urtarrilak 23] izango da, 11:30ean. Aurretiaz izena eman behar da.
Euskal Kostaldeko UNESCO Geoparkeak antolatuta, Mutrikuko Arrietakua Jauregia bisitatzeko aukera egongo da zapatuan [urtarrilak 23]. Parte hartu nahi dutenei ahalik eta arinen izena emateko esan diete; Mutrikuko Turismo Bulegoan edo Internetez izena eman daiteke.
Aurreratu dutenez, egungo egoera dela eta, gehienez ere bost pertsonentzako lekua egongo da.
Eraikinari buruz. Arrietakua jauregia Mutrikuko Alde Zaharrean kokatuta dagoen barroko estiloko eraikina da, eta 1964an ondare kultural izendapena jaso zuen.
Sute bat gertatu eta gero, Espainiako Erregearen Itsas Armadako teniente jenerala zen Antonio de Gaztañetak eraikina berreraikitzeko agindu zuen 1727. urtean.
Gerora, Cosme Damian Txurruka euskal itsasgizon ospetsuaren jaiolekua ere izan zen. Hori dela eta jende askok Txurrukaren etxea bezala ezagutzen du. Gaur egun, Enrique Areilza Churruca Mutrikuko kondearen jabegokoa da.
2018an hasi ziren bisita gidatuak eskaintzen, kondeak Mutrikuko Udalarekin eta Gizpuzkoako Foru Aldundiarekin hitzarmena sinatu eta gero.
