Ostalariei laguntzeko diru laguntza berriak emango ditu Markina-Xemeingo Udalak
Gutxienez 12.650 euroko diru laguntza zuzena emango dutela aurreratu dute. Establezimenduen terrazetako inbertsioak ordaintzeko diru laguntzak eskatzeko epea luzatu egin dute.
Markina-Xemein eremu gorrian sartu dela eta, herriko taberna eta jatetxeak itxi egin behar izan dira berriro ere, eramateko zerbitzua eskaintzeko aukera besterik ez daukatelarik. Egoera horren aurrean, Markina-Xemeingo Udalak ostalaritza sektoreari laguntzeko neurri berriak onartu ditu.
Alde batetik, zuzeneko diru laguntzak emango dituzte Lea-Artibai Garapen Agentziaren bidez. Jakitera eman dutenez, gehienez hileko 550 euroko diru laguntza emango zaie hile osoa itxita duten establezimenduei. Itxialdia hilabete baino gutxiagokoa denean, berriz, laguntzaren zenbatekoa itxita egon diren egunen arabera kalkulatuko da.
Konfinamenduan itxita egon ziren negozioentzat ere laguntzak eman zituen Markina-Xemeingo Udalak. 20 ostalariren artean 11.000 euro banatu zituztela esan dute. “Horrez gain, Udalak beste 12.650 euro eman zituen azaroaren 6ko dekretuaren eraginez euren jarduera eten behar izan duten herriko 23 ostalarientzat. Hirugarren deialdi honetan ere gutxienez 12.650 euro emango direla aurreikusten da. Aurrera begira, ostalaritzaren sektoreari laguntzen jarraitzea eta deialdi berriak aktibatzea da udalaren asmoa”, azaldu dute.
Horrez gain, bestelako laguntza batzuk ere abiarazi dituzte. Besteak beste, terrazei Bide Publikoaren Okupazio Tasan %50eko hobaria 2021eko maiatzera arte luzatzea onartu dute, eta Markina-Xemein gune gorrian den bitartean, zabor eta estolderiagatik ordaintzen den zerga ordaintzetik salbuetsita egongo dira ostalariak.
Ostalaritza establezimenduen terrazetako inbertsioak finantzatzeko ere diru kopuru bat onartu dute, 27.441,92 eurokoa hain zuzen ere. Horren bidez, establezimenduek egindako material erosketa edo inbertsioaren %60ra arte diruz lagunduko dute, 1.000 euro gehienez, baina eskaera kopuruaren arabera laguntza handiagoak jaso ahal izango direla argitu dute. “Partida hori osorik banatuko du udalak eskatzaileen artean, beti ere gain finantzaziorik ez badago”.
Diru laguntza hori eskatzeko epea luzatu egin dute otsailaren 26ra arte. Eskaerak udalaren helbide elektronikora idatzita egin daitezke edo aurrez-aurre aurkeztu daitezke udaletxeko Berton bulegoan. Deialdia, oinarriak eta inbertsio ereduak udalaren webgunean.
