Apurketak egin dituzte Lekeitioko Usotegiko ortuan
Lekitto Bedarra elkartekoek esan dute apurtutako gauza batzuk konpontzen saiatu direla, baina ortuko lerroetan eragindako kalteak ezin direla konpondu.
Boluntario bat, apurtutako hesia konpontzen. Argazkia: Lekitto Bedarra Lekitto Bedarra Lekeitioko ortularien elkartekoek salatu dute Usotegiko ortu publikoan apurketak egin dituztela. Zehaztu dute gazte batzuek jolasorduan egin dituztela kalteak. Apurketa batzuk konpontzen saiatu badira ere, ortuko lerroetan egindako kalteak ezin dira konpondu. “Ortuko lerroak (landarak hazten diren gunea) zapaltzea izan da larriena. Izan ere, jaiotzen zeuden ilar landarak galdu ditugu”.
Esan dute “asko kostata” hirugarrenez landatu zituztela ilarrak, eta orain horiek galdu dituztela. “Berriro horrelakorik gertatu ez dadin haiekin berba egingo dugu”.
Ostera antzean, eta orain arte legez auzolana oinarri hartuta, taldeak ortuko lanekin aurrera jarraitzen du. Hala, parkean kartel berriak jartzeaz gain, letxugak ere zaindu dituzte. “Egindako konposta ortuko lerro batean ere zabaldu dugu, uzta hobea lortzeko eta gero, uzta hori behar dutenei banatzeko”.
Boluntarioak, konposta ortuko lerro batean zabaltzen. Argazkia: Lekitto Bedarra
Boluntario bat, letxugak zaintzen. Argazkia: Lekitto Bedarra
Kartel berriak ipintzen. Argazkia: Lekitto Bedarra
Boluntario talde bat. Argazkia: Lekitto Bedarra
