Euskal Herriko lehen Esneki Zentroa zuzenduko du Markina-Xemeingo Leartikerrek
Esne eta esnekien sektorea indartzea du helburu, zentro horretan eskainiko diren zerbitzu ezberdinei esker.
Leartikerren zuzenduko duen Esneki Zentroa. Argazkia: Leartiker Euskal Herriko lehenengo Esneki Zentroa jarri du martxan Markina-Xemeingo Leartiker Zentro Teknologikoak, Hazi Fundazioa eta Eusko Jaurlaritzagaz elkarlanean. Esne eta esneki sektoreko beharrak eta gabeziak bultzatuta, Bizkaia, Gipuzkoa eta Arabako sektore hori indartzea dute helburu. Esneki Zentro horren bidez aholkularitza tekniko aurreratua, formazio espezializatua, berrikuntza proiektuen garapena eta beste hainbat zerbitzu eskainiko ditu Leartikerrek, elikagaien segurtasuna oinarri hartuta.
Azaldu dutenez, Euskal Herriko esneki sektorea artisaua da, tradizionala eta ekoizle txikiz osotua. 2019ko datuen arabera, Bizkaia, Gipuzkoa eta Araban 190 gaztandegi daude, eta horietatik %95 erabat artisauak dira, hau da, familia unitateak dira eta esnea ekoizteaz gain eraldaketa lanetan ere murgilduta daude. “Mikro-gaztandegi ereduan oinarritzen dira, gazta tradizionalak ekoizteko balio erantsia mantendu eta ziurtatzeko asmoz, baina eredu horrek gabeziak ere sortzen dizkiete, hala nola, gaitasun ekonomiko urria: inbertsioak gauzatu, teknologia berriak barneratu, produktuetan dibertsifikatu, langileak kontratatu… Sektorea ez da gai ekonomikoki esparru guzti horiei aurre egiteko”.
“Esneki sektoreko ekoizleentzako erreferentziazko zentroa izango da, zerbitzu aurreratua, pertsonalizatua eta eraginkorra jasotzeko bermea izango dute eta sektoreko beste eragileekin etengabeko elkarlana izango du oinarri”
Beraz, esne-ekoizpena, esnearen eraldaketa, araudi higieniko-sanitarioen aplikazioa eta kontrola, produktuen merkaturatze-prozesua eta beste hainbat jarduerei aurre egiteko kanpo aholkularitza tekniko baten premia handia nabaritu dute, eta premia horretan oinarrituta sortu dute Esneki Zentroa. “Urteetan zehar egindako lanak emandako esperientzia eta ekoizleekin izandako harreman estuari esker, Leartikerrek zuzenduko duen zentro hau Euskal Herri mailan esne eta esnekien sektorean erreferente izateko jaio da”.
Leartikerretik jakitera eman dutenez, azken urteetan, esparru ezberdinetan aritu dira lanean, 100 ekoizle baino gehiagogaz. “Azken urteetako ibilbide arrakastatsu horri esker, erronka berriei aurre egiteko garaia iritsi da eta Esneki Zentroa da horren adibiderik argiena. Esneki sektoreko ekoizleentzako erreferentziazko zentroa izango da, zerbitzu aurreratua, pertsonalizatua eta eraginkorra jasotzeko bermea izango dute eta sektoreko beste eragileekin etengabeko elkarlana izango du oinarri”.
