Nahia Quincocesek Munduko Koparen 3. proba lehiatuko du
Frantzian dago mendexarra. Barikuan (otsailak 5) bakarkako lasterketa daukate, eta zapatuan (otsailak 6) esprinta.
Nahia Quincoces Flainen (Frantzia) dago Munduko Koparen 3. proba lehiatzeko. Grand Massif de Flaine proba lehiatuko dute barikuan eta zapatuan [otsailak 5 eta 6]. Banakako lasterketa daukate bihar, eta zapatuan, berriz, esprinta.
Elurra “hain tekniko egonda”, jaitsierek aldea markatuko dutela uste du. Izan ere, mendexarra eguaztenean heldu zen Flainera, eta elurra oso astun dagoela azaldu du: “Elur asko egin zuen, baina gero euri asko. Elurra oso astun dago, eta jaisteko nahikoa gaitza izaten da. Jaisten ondo dakienak asko irabazi ahal du. Gaineko geruza eguzkiak asko berotzen duenean, eta gauean izozten denean, gainean geruzar gogor bat sortzen da, eta hor eskiatzea oso gaitza da. Arrisku hori dago, eta ea ez den hori gertatzen”.
Aurreko lasterketetan baino hobeto sentitzea espero du. Azken asteetan ondo entrenatzen ibili da, eta egindako lanak bere fruitua ematen duen ikusi nahi du. Entrenamenduetako sentsazio onak bi egun hauetan islatzea: “Gustura ibili naiz entrenatzen, eta ea horren fruituak hartzen ditudan”.
Espainiako selekziotik, senior kategorian, hiru emakumek eta bost gizonezkok parte hartuko dute. Hain zuzen, horietako batzuk aurreko astean Verbier (Suitza) lehiatu zuten Munduko Koparen 2. proba.
Euskal Herriko Kopa bertan behera. Euskal Mendizale federazioak 2021eko Euskadiko Mendiko Eskiko Koparen antolaketa bertan behera uztea erabaki du, pandermiaren bilakaeragatik. “Gaur egun, EMF-FVMk ez du bermerik ikusten 2021ean Kopa baten garapen normala bermatuko duten gutxieneko eski proba kopuru bat egiteko, eta ez die ziurgabetasun gehiago gehitu nahi jokoan dauden aldagaiei”, adierazi dute federazioaren arduradunek.
Zehaztu dute elkarlanean jarraituko dutela antolatzaileekin, pandemiaren bilakaeraren arabera, unean uneko probak aurrera ateratzen saiatzeko.
Mendexar mendi eskiatzaileak esan du berria “penaz” hartu dutela, baina espero zutela: “Jendea ezin denez mugitu bere herritik entrenatzeko eta lehiatzeko, ikara hori genuekan. Lasterketarik politenak eta ezagunak direnak, jende asko batzen direnak bertan behera geratzen ari dira, eta pena da. Momentuz open gutxi daude martxan segitzen dutenak”.
Gaur gaurkoz, Munduko Kopako probak eta martxoaren 2tik 6ra Andorran lehiatuko dituzten Munduko Txapelketak ditu begiz jota, eta horietan parte hartzeko esperantza dauka.
