Aurten ere ez da egingo Oporrak Bakean programa
Iaz gertatu modura, osasun larrialdia dela-eta aurten ere programa bertan behera uztea erabaki dute, "pena handiz".
2017ko Oporrak Bakean programan parte hartu eta Ondarroara etorri ziren ume sahararrei ongietorria emateko ekitaldia. Argazkia: Yaalah Elkartea Espainiar estatuko saharar delegaritzak jakinarazi duenez, aurten ere ez da egingo haur sahararrak uda Euskal Herrian igarotzeko Oporrak Bakean programa. Esan dutenez, osasun larrialdia da bigarren urtez programa bertan behera uzteko arrazoia. “Pena handiz, baina osasun egoerak eskatzen duen beharrezko neurria da”, esan dute Yaalah Ondarroako Saharar herriaren aldeko elkarteko kideek.
Oporrak bakean 1976az geroztik urtero burutzen den elkartasun proiektu erraldoia da. “Tindufeko (Algeria) saharar errefuxiatuen kanpalekuan bizi diren adin tarte jakin bateko haurrei, uda hobe bat igarotzeko aukera ematen die programak. Hala, Euskal Herrira ehunka haur etorri izan dira urtero harrera familietara edo aterpetxeetara”. Besteak beste, ondoko helburuak ditu programak: desertuko egoera gogorra saihestea, ume sahararrei elikadura egokia bermatzea, kultura trukaketa bultzatzea, hizkuntza ikastea eta bi herrien arteko elkartasun lotura indartzea.
“Proiektu hau egin ez izan beharra litzateke gure nahi handiena, eta udan gu joan beraien herri askera bisitan. Bitartean ondoan izango gaituzue! Aurten ere faltan botako zaituztegu!”, esan dute Ondarroako elkarteko kideek.
Saharar delegaritzak azpimarratu du programak bizirik jarraitzeko hartutako konpromisoak bere horretan jarraitzea espero duela. “Espero dugu bizi dugun egoera hau ahalik eta arinen konpontzea eta gure ohiko jarduerari berrekitea. Alegia, herrialde sahararraren aldeko ekintzak egiten jarraitzea”.
