Quincoces lehenengo hogeiren artean geratu da Munduko Koparen 3. jardunaldian
Munduko Koparen 3. jardunaldia Frantzian lehiatu dute, eta Nahia Quincoces mendexarrak 20. postuan amaitu du banakako lasterketa eta 18. esprint proba.
Argazkia: Jesus Dymages. Munduko Koparen 3. jardunaldian lehenengo hogeiren artean geratu da Nahia Quincoces mendi eskiatzaile mendexarra; Flainen lehiatu zuten proba (Araches-la-Frasse, Frantzia).
Barikuan (otsailak 5) banakako lasterketa egin zuten, eta hori hogeigarren postuan amaitu zuen Quincocesek. 1.600 metroko desnibel positiboa sahiestu behar izan zuten, eta Axelle Gachett Mollaret frantziarra izan zen denetan azkarrena, 1:38,35 denboragaz. Mendexakoak 1:56,16 denboran burutu zuen proba.
Munduko Koparen 3. jardunaldiari hasiera eman zion lasterketa horretan, mendexarra ez zen gustura eta eroso aritu: “Ez nintzen oso ondo sentitu. Hasieran gorpuzkera eskasagaz moduan egon nintzen, eta kostatu egin zitzaidan erritmoa hartzea. Baina aurrera egin nuen, eta amaitzea lortu nuen. Agian ez zen espero nuena, baina lasterketaren bigarren zatian gehiago disfrutatu nuen”.
Zapatuan sentsazio hobeekin lehiatu zuela dio: “Esprintak ez dira agian nire espezialitatea, baina ondo sentitu nintzen. Indarragaz sentitu nintzen, eta aurreko egunean baino gorpuzkera askoz hobea eduki nuen”. 18. sailkatu zen esprintean. Marianne Fatton suitzarrak irabazi zuen lasterketa.
Aurreko astean botatako euriak elurra astun egotea eragin zuen. Mendexarrak azaldu du barikuan banakako lasterketa lehiatzeko “nahikoa onak” eduki zituztela: “Zortez, banakakoa egiteko ateri egon zen. Goian haizea egon zen, baina behean ez. Gauean hotz egin zuenez, elurra izoztu egin zen, eta ondo egon zen”. Biharamunean, berriz, zirkuitua basaz beteta eduki zuten: “Bitxia izan zen, dena marroi-marroi zegoen eta. Zirkuitu oso polita izan zen. Hasiera nahikoa lauagaz, eta gero oinezko zatia eta jaitsiera nahikoa aldapatsuak, salto handi bategaz”.
Bere taldekideek lortutako garaipenengatik pozik dago mendexarra; Ana Alonsok eta Marta Garciak zilarra eta brontzea irabazi zituzten, eta Oriol Cardonak urrezko domina eskuratu zuen esprintean, hasieratik bukaerara nagusi izanda.
Hurrengoa, Italian. Munduko Kopako 4. proba bi aste barru (otsailak 20 eta 21) jokatuko dute Italian, Marteleko estazioan jokatuko den Marmotta Tropy proban. Quincocesek bertan egotea espero du. Aste honetan jakingo dute Espainiako selekziotik zeintzuk ariko diren horretan.
