Ostalarientzako diru laguntzak banatzen ari dira udalak
COVID-19aren ondorioz ostalaritza jasaten ari den egoera arintzea dute helburu laguntzek. Markina-Xemeingo eta Lekeitioko Udalek eman dituzte laguntzak.
COVID-19 pandemiaren aurreko babes neurriak direla-eta udalerriak gune gorrian egon diren asteetan ostalaritzak ateak itxita eduki behar izan ditu, eta sektoreari laguntzeko diru laguntza zuzenak eman dituzte udalek, besteak beste Markina-Xemeingo eta Lekeitioko Udalek.
Guztira, Lekeitioko 55 establezimendu izan dira diru laguntza horren onuradunak, eta horietako bakoitzak 550 euro jaso ditu itxita egon diren hilabeteagatik. Pandemia hasi zenetik, diru laguntza horien hirugarren deialdia egin dute, eta laguntzak, eskualdeko beste hainbat udalekin batera, Leartibai Garapen Agentziaren bitartez bideratu dira.
550 euroko diru laguntza zuzenak eman dizkie Markina-Xemeingo Udalak ere udalerria eremu gorrian egon den bitartean euren establezimenduak itxita eduki behar izan dituzten herriko 25 ostalariri. Guztira, beraz, 13.750 euro bideratu ditu udalak diru laguntzen hirugarren deialdi honetan herriko ostalaritzara.
Horrez gain, udalerri biak eremu gorrian egon diren bitartean, zabor eta estolderiaren zerga ordaintzetik salbuetsita egon dira taberna eta jatetxeak. Era berean, ostalaritzako terrazak arautuko dituen ordenantzan ekarpenak egiteko epea zabalik dauka Lekeitioko Udalak, eta interesdunek haien ekarpenak egiteko aukera izango dute martxoaren 12ra arte.
Bestalde, Leartibai Garapen Agentzia Bizkaia, Gipuzkoa eta Arabako turismo sektoreko enpresei bideratutako diru laguntzen izapideekin ere laguntza eta aholkularitza eskaintzen ari da. Laguntza horrek Eusko Jaurlaritzak ematen ditu, eta otsailaren 23ra arte egin daitezke eskaerak.
