Elkarretaratzeak egin dituzte Pablo Haselen kartzelaratzea salatzeko
Besteak beste, Lekeition, Ondarroan eta Mutrikun egin dituzte protestak. Lekeitioko eta Ondarroako elkarretaratzeak Lea-Artibaiko Kontseilu Sozialistak eta Gazte Koordinadora Sozialistak deituta egin ziren, eta Mutrikuko herriko gazte asanbladak deituta.
Lekeitioko elkarretaratzea. Argazkia: Lea-Artibaiko Kontseilu Sozialista. Pablo Hasel rap abeslari kataluniarra atxilotu zuten joan den astean, Espainiako monarkia iraintzea eta terrorismoa goratzea egotzita. Horren haritik, Haselen espetxeratzea salatzeko eta aske uzteko exijitzeko elkarretaratzeak egin zituzten zapatuan [otsailak 20], Lekeition, Ondarroan eta Mutrikun. “Horrez gain, egun hauetan abeslariari elkartasuna adierazteagatik zein jazarpen polizialari aurre egiteagatik errepresioa jasan duten guztiei babesa adierazi ere nahi izan diegu”, esan dute Lekeitio eta Ondarroako mobilizazioak deitu zituzten Lea-Artibaiko Kontseilu Sozialistak eta Gazte Koordinadora Sozialistak.
Haselen kartzelaratzea oinarrizko eskubideen ezabapenaren “adibide garbia” dela diote, “zehazki adierazpen askatasunarena”. Hori, hain justu, estatu demokratiko burgesak ezartzen ari diren “erregimen totalitarioen barruan” ulertu behar dela esan dute. “Burgesiaren interesei erantzuten dion demokrazia ez da gure askatasunen eta justiziaren bermea, baizik eta gure zapalkuntzaren eta askatasun politikoen urratze sistematikorako tresna”. Zehaztu dute askatasun politikoen eskuratze progresiboa dela sozialismoaren eta klase zapalduarentzat askatasun errealaren berme bakarra.
Amnistiaren aldeko aldarria ere egin dute: “Burgesiaren erregimenari aurre egiteagatik errepresioa jasan duten horien egoerari aurre egiteko errebindikazio politikoa da amnistiarena. Horregatik, Pablo Haselen atxiloketaren aurrean amnistia aldarrikatzen dugu, eta amnistiaren gaurkotasuna defenditzen dugu”.
Ondarroako elkarretaratzea. Argazkia: Lea-Artibaiko Kontseilu Sozialista.
Mutrikuko elkarretaratzea. Argazkia: Mutrikuko Gazte Asanblada (Facebook)
Lekeitioko elkarretaratzea. Argazkia: Lea-Artibaiko Kontseilu Sozialista.
