Ispasterko Udalaren 2022ko egutegirako argazki lehiaketa, martxan
Argazkilari profesionalak ezin dira lehiaketara aurkeztu. Udalerrikoak ez direnek ere parte hartu dezakete.
2021 urtean zehar Ispasterren ateratako argazkiekin osatu gura du Ispasterko Udalak 2022ko egutegia, eta beraz, argazki lehiaketaren oinarriak kaleratu dituzte. Argazkilari profesionalak ez direnei zuzendutako lehiaketa da, eta ispastertarrek ez ezik, udalerrikoak ez direnek ere parte hartu dezakete.
Gaiari dagokionez, herriagaz zerikusia duten argazkiak bidali behar dira: ekintzak, pertsonak zein paisaiak. Egutegiaren ezaugarriekin (34zm zabaleran eta 24zm altueran) bat eginez, derrigorrez horizontalean ateratarako argazkiak izan beharko dira. Argazki digitalak izan behar dira, eta kameraren erresoluzio eta kalitate handienean, konpresio txikienean eta JPEG edo RAW formatuan ateratakoak izan behar dira: “Erresoluzio gutxiegi dituzten argazkiak ez dira onartuko, gutxienez 4.000 X 3.000 pixel izan behar dituzte”.
Parte hartzaile bakoitzak gehienez 12 argazki aurkeztu ditzake, eta urriaren 29a izango da lanak aurkezteko azken eguna: “Ondo legoke argazkiak hilez hile ateratzea”.
Udalaren webgunean dagoen estekan karpeta bat sortu behar dute lehiaketara aurkezten direnek, eta bertan gorde beharko dituzte euren argazkiak. Pertsonak aurrez aurre edota ezagutzeko moduan agertzen diren argazkiak aurkezteko, haiek sinatutako baimena aurkeztea derrigorrezkoa da. 18 urtez azpikoen kasuan, gurasoek edo tutoreek sinatuta egon beharko dira baimenak.
Bi sari nagusi banatuko dituzte. Argazki saritu horiek egutegiaren azalean eta kontrazalean agertuko dira, eta gainontzeko hamabiekin apainduko dituzte hilabeteen orrialdeak. Lehenengo sariaren irabazleak 150 euro jasoko ditu, eta bigarrenarenak 100 euro. Egutegi barruan joango diren beste hamabi argazkien egileei, berriz, 50 eurona emango dizkiete.
Lehiaketara aurkeztutako argazki denekin erakusketa osatuko dute; azaroaren erdialdetik urtea amaitu arte egongo da ikusgai.
