Lea-Artibain duela bi urte baino hondakin gutxiago sortu zen iaz
Azken bost urteetako joerari eutsiz, iaz hondakin guztien kopurua %2,4 jaitsi zela esan du Lea Artibai Amankomunazgoak. 2019tik 2020ra errefusa kopurua jaitsi bada ere, oraindik ere batzen den hondakinen zatirik handiena dela diote (%55,21).
Lea Artibai Amankomunazgoak iazko hondakin bilketaren datuak jakinarazi ditu. Datuak aztertuta ondorioztatu dute iaz duela bi urte baino %2,4 hondakin gutxiago sortu zela Amankomunazgoa osatzen duten herrietan (Lekeitio, Markina-Xemein, Ondarroa, Etxebarria, Berriatua, Ziortza-Bolibar, Ispaster eta Gizaburuaga –Gizaburuaga iazko abenduan atera zen Amankomunazgotik–). Hondakin gutxiago sortzea azken bost urteetako joera dela esan dute. Dena dela, oraindik orain sortutako hondakin guztien erdia baino gehiago (%55,21) errefusa dela diote.
Amankomunazgoa osatzen duten herrien artean Ondarroa da errefusa gutxien sortzen duen herria; batazbestekoa %55,21 bada ere, Ondarroan %52,83 sortzen da. Atzetik datoz Ziortza-Bolibar (%55,30), Lekeitio (%56,02), Markina-Xemein (%56,62), Berriatua (%58,97), Etxebarria (%61,25) eta Ispaster (%70,05).
Etxealdiak iraun zuen hilabeteetan %6,23 hondakin gutxiago sortu zela ondorioztatu dute
Oro har, birziklatzera bideeratzen diren hondakinek “joera ezegonkorra” erakusten dutela esan dute. “Batzuk igo egin dira, eta beste batzuk jaitsi”. Hala, iaz 2019an baino %3,25 hondakin organiko gehiago jaso zuten, eta edukiontzi horiko hondakinak ere igo egin ziren iaz (%7,99). “Olioaren bilketa ere igo egin zen (%6,55)”. Baina paperaren eta kartoiaren bilketa, beirarena eta edukiontzi zurira botatako materialena jaitsi egin zen: %1,09, %13,42 eta %12,87 jaitsi ziren, hurrenez hurren. “Kontuan edukita martxotik maiatzera etxealdia egon zela, hondakin mota batzuen bilketan beherakada gertatzea kontsumoa jaistearen ondorio izan liteke. Beiraren kasuan, esaterako, hein handi baten tabernak itxita egoteagatik izan liteke”. Ildo horretatik, organikoa gehiago jaso izana etxean gehiago sukaldatu zelako izan litekeela diote.
Bestelako aipamena egin dute pilen kasuan. Izan ere, ia bikoiztu egin da jasotako pila kopurua. “2019an 1.567 kilo jaso ziren eta iaz 2.580. Datua ikaragarria da”.
Konfinamenduaren eragina. Etxealdiak iraun zuen tartean hondakin gutxiago sortu zela ere ondorioztatu dute. “Urteko lehen hilabeteetan %3,39 hondakin gutxiago sortu zen, aurreko urteetako antzeko datua. Etxealdiak iraun zuen tartean, baina, %6,23 hondakin gutxiago sortu zen”. Uda sasoian, baina, 2019an baino %1,71 hondakin gutxiago sortu zen. “Udan hondakinen murrizketa moteldu egin zen”.
