Mahatsaren inausketaren saio praktikoa egingo dute Lekeition
Lekitto Bedarrak antolatuta egingo da saioa, zapatuan [otsailak 27], Usotegin. Parte hartu nahi dutenek hitzordura agertu beharko dute; ez dute aldez aurretik izena eman behar.
Lekitto Bedarrak mahatsaren inausketaren saio praktikoa antolatu du zapaturako [otsailak 27]. Saioa 10:30ean hasiko da eta Usotegin egingo dute. Joan den asteko zapatuan ere mahatsaren inausketa ikastaroa egin zuten. Orduan, baina, Santa Katalinako lorategian egin zuten.
Esan dute zapatuko saioa joan den asteko ikastaroaren jarraipena izan daitekeela. Baina ikastaro hartan parte hartu ez zutenek ere honetan parte hartzeko aukera daukatela gaineratu dute. “Mahatsaren inausketa nola egiten den ikasi nahi duten guztiei zuzenduta dago”.
Parte hartzeko ez da aldez aurretik izena eman behar. “Interesatuek nahikoa izango dute zapatuan [otsailak 27] 10:30ean Usotegira agertzea”. Aurreko astean modura, saio hau ere Pipas txakolindegiko Anton Onaindiak gidatuko du.
Usotegin hiru urte inguru dituzten bost mahatsondo daudela esan dute. “Oso egoera onean daude. Saioan ekoizpen egoki bat lortzeko mahatsa nola ondo inaustu irakatsiko du Onaindiak”.
Ikastaroaren balorazioa. Lekitto Bedarrekoek esan dute Onaindiak joan den asteko ikastaroaren balorazio ona egin duela. “Ikastaroan 17 herritarrek parte hartu zuten, txanda ezberdinetan”. Esan dutenez mahatsen egoera ez zen ona izan, baina ikastaroak oinarrizko kontzeptuak barneratzeko balio izan zieten. Besteak beste, adar zaharrak kendu, enbor ondoko zutabeak utzi eta besteak kendu, hori noiz egin eta nola zaindu ikasi zuten. Ikastaroaren amaieran Pipas txakolina dastatzeko aukera ere eduki zuten partaideek.
