Lekeitioko Musika Eskola Hezkuntza sailaren aitortzaren zain dago ofizial bihurtzeko
Lekeitioko Udalak eraikinaren egokitzapen lanak amaitu ditu. Lan guztien kostua 416.358 eurokoa izan da.
Lekeitioko Musikaia Musika Eskola. Argazkia: Musikaia Eraikinaren egokitzapenak amaituta, Eusko Jaurlaritzako Hezkuntza Sailaren aitortza besterik ez zaio falta Lekeitioko Musikaia Musika Eskolari ofizialtasunaren aitortza lortzeko. 289/1991 dekretuan zehazten den beharretara egokitu behar izan dute eraikina horretarako. Hau da, Musika Eskolen araudiak eskatzen dituen moldaketak egin behar izan ditu udalak eraikinean, eta orain Hezkuntza sailak eraikina aztertuko du, haiek zehazten dituzten irizpideetara egokitzen dela baieztatzeko eta ofizialtasun tramitazioa egiteko.
Lanek eskolarentzako erabilgarria den azalera handitzea bilatu dute. Erdiko solairuan, Musika Eskolek dituzten premiak kontuan hartuta, 20 metro koadroko gela bi eraiki ziren eta beste hiru 15 metro koadroko baino gehiagokoak. Horrez gain, irakasleen gela bat ere egin zen 20 metro koadrokoa. Era berean, gela guztiei isolamendu akustikoa jarri zieten eta komunak egokitu ziren. Gainera, eraikinaren kanpoaldetik araudia betetzeko beharrezkoa den larrialdietako irteera bezala erabiliko den eskailera egin zuten.
Lanen bigarren fasean eraikinaren beheko solairua egokitu zuten. Musika Eskolaren idazkaritza eta entsegu gela jarri dituzte bertan eta, azken hori, asteburuetan 6 eta 8 urte bitarteko umeentzako Gaztegune bezala erabiliko dela jakitera eman du udalak. Izan ere, eraikin berean asteburuetan Gaztegune zerbitzua ematen da, hori dela eta, eraikina Musika Eskola eta Gaztegune bezala birgaitzeko lanak egin dituzte bi zerbitzuak bateragarriak izateko. Lan guztien kostua 416.358 eurokoa izan da.
