EH Bildu: "Lea-Artibain ezarri genuen hondakin bilketa sistema baliagarria izan da, aldundiak Bizkai osora zabaldu du eta"
Bizkaiko Foru Aldundaik duela aste batzuk iragarri zuen Lea-Artibaiko hondakin bilketa sistema Bizkai osora zabalduko dutela. Lea-Artibaiko EH Bilduk gogorarazi du Lea-Artibain ezarritako sistema Bizkaiko Batzar Nagusietan eta baita ere eskualdean "borroka asko" egin ostean ezarri zela.
Rakel Elu (EH Bildu) Lea-Artibai Amankomunazgoaren presidente ohia eta Elena Unzueta Aldundiko Ingurumen diputatua, 2017ko abenduan Lea-Artibaiko hondakin bilketa sistema berria aurkezteko agerraldian. Bizkaiko Foru Aldundiak otsailaren 16an esan zuen Lea-Artibaiko hondakin bilketa sistema Bizkai osora zabalduko zutela martxotik aurrera. Albiste horren aurrean, Lea-Artibaiko EH Bilduk ondokoa esan du: “Aldundiak hartutako erabakiak erakustsen du guk 2018an ezarritako sistemak funtzionatu egiten duela”.
Koalizioa Lea-Artibai Amankomunazgoaren ardurapean zegoenean ezarri zen hondakinak batzeko sistema berria eskualdean. Eta proiektu pilotu moduan ezarri zena, orain Bizkai osora hedatu da. “Bizkaiko Batzar Nagusietan eta baita eskualdean ere borroka asko egin ostean ezarri zen guk proposatzen genuen sistema. Guk argi geneukan bilketa sistema honekin lortuko zen konposta eta sailkapena tasa onak izango zirela. Urrun joan beharrik gabe Gipuzkoan zegoen eta dago horren adibiderik garbiena. Asko kostata ezarri genuen sistema hau eta urteekin ikusi da zein baliagarria izan den. Lehen honetan sinesten ez zutenak ere sistema honetara batzera doaz orain. Albiste ona gure ustetan”.
Gaineratu dute Bizkaiko datuekin alderatuta Lea-Artibain 2020an jasotako hondakinen %11 organikoa izatea “oso tasa altua” dela, baina oraindik ere hiri hondakinen tasak (errefusa) batazbeste %55ekoa izaten jarraitzen duela azpimarratu dute. “Kopuru hori gutxienez %40ra jaistea lortu behar da. Gure aldetik Amankomunazgoan helburu hori lortzeko borrokan jarraituko dugu, iraunkortasunaren aldeko benetako apustua eginez”.
Aldundiak Lea-Artibaiko hondakin bilketa sistema lurralde osora zabalduko zutela esan zuenean gaineratu zuen Milloiko transferentzi gunean hondakin organikoak tratatzeko azpiegitura ipiniko zutela. “Lea-Artibaiko EH Bilduk 2015etik darama hori eskatzen, eta aldundiak orain eskari hori beteko du”. Azpiegitura horrekin prozesu guztia Lea-Artibain egin eta geratuko dela eta eskualdean sortutako hondakin organikoetatik eratorritako konposta eskualdeko biztanleen esku geratuko dela azpimarratu dute. “Eta ez orain arte bezala guretik kilometro askotara dauden tratamendu plantetara eraman eta eskualdean konposta aprobetxatu gabe geratzea”.
Milloiko transferentzi gunean azpiegitura hori ipintzeko proiektua 2015etik dagoela eginda esan du koalizioak; “EH Bilduren agintaritzapean zeuden eskualdeko udalen artean gauzatu zen”.
Horren guztiaren aurrean, hondakinen sailkapena handitzeko aurrerapausoak ematen ari direla gaineratu dute, “gutxinaka bada ere”.
