Etxebarriko udaletxea berrantolatzen ari dira
Administrazio bulegoak beheko solairuan geratuko dira eta gizarte zerbitzua eta medikuaren kontsulta gora eramango dituzte.
Herritarrei zerbitzu hobea eskaini asmoz, Etxebarriko udaletxea eraldatzen ari dira azken asteetan. Administrazio bulegoak beheko solairuan utzi eta gizarte zerbitzuak eta medikuaren kontsulta lehen solairura lekualdatuko dituzte.
Idazkariak eta Euskara Teknikariak euren bulegoak edukiko dituztela jakitera eman du Jesus Iriondo Lejardi Etxebarriko alkateak, “herritarrekin batu ahal izateko”. Horiekin batera egongo dira beheko solairuan, harrera, bulego teknikoa eta alkatetza. “Idazkariaren bulegoa harrera zerbitzuaren ondoan egongo da, eta beste aldean kokatuko da Euskara Teknikariarena”.
Azpiegiturak prest dituzte jada, baina altzarien zain daude. “Horiek jartzen dituztenean eraldaketa osoa amaituta geratuko da, eta udal arlo bakoitza bere lekuan”, azaldu du alkateak. Gizarte Zerbitzuetako langilea goian dago lanean jada, baina beheko bulego berriak egokitzea falta zaie.
Irailetik Sabin Juaristi da Etxebarriko udaletxeko idazkaria, Euskara teknikaria, berriz, Urtzi Uriarte. COVID-19 gaitza dela eta, momentuz ez dira arreta medikoko zerbitzurik eskaintzen ari udaletxean.
