Munitibarko udal aurrekontuak erabakitzeko herritarren ekarpenak jasoko dituzte aurten ere
Udal aurrekontuei buruzko parte hartzea saioa zapatu eguerdian [martxoak 13] egingo dute, udal aretoan. Saioa Internet bidez jarraitu ahalko da.
Beste urte batez, Munitibarko Udalak herritarren iritziak eta ekarpenak bildu nahi ditu udal aurrekontuak osatzeko, eta horretarako parte hartze saioa egingo dute. Hain zuzen, abenduaren amaieran pandemiaren bilakaeraren ondorioz bertan behera utzi behar izan zuten, eta orain egitea erabaki dute. 2021eko udal aurrekontuei buruzko batzarra egingo dute zapatuan [martxoak 13], 12:30etik aurrera, udal aretoan. Saioan telematikoki parte hartzeko aukera egongo da esteka honen bidez: https://meet.jit.si/aurrekontuak2021
Udal ordezkariek adierazi dute “batzarra erabakigarria” izango dela, parte-hartze ariketa horretan erabakiko dituztelako 2021eko egitasmoak, eta beraz, proposamenak eta iritzia emateko dei egin diete herritarrei.
