Ingurumena eta elkartasuna batzen dituen erronka egingo dute Ispasterren
Menke-Hennekam sindromea daukan aulestiarrari laguntzeko ekintza egingo dute Ispasterren, zapatuan [martxoak 27]. Ispasterko Udalak 300 kilo zabor batzeko erronka luzatu die herritarrei.
Menke-Hennekam sindromea daukan ume aulestiarrari laguntzeko asmoz, zapatuan [martxoak 27] gutxienez 300 kilo zabor batzeko erronka ipini die herritarrei Ispasterko Udalak.
16 taldek izena eman dute: “Bi talde hiruko pertsonakoak dira, eta beste guztiak laukoak. Talde asko familiak dira, gurasoak umeekin. Ea eguraldi ona egiten duen. Familian egiteko ekintza polita izango da, eta ea erronka lortzen dugun”.
Izena emateko aukera atzora arte eman zuten, eta orain, udalerriko gune batzuk aukeratu, eta talde bakoitzari bana egokituko diote: “Ispaster oso-osorik ez dugu hartuko, handia delako, baina zonaka banatuko ditugu, eta talde bakoitzari jakinaraziko diogu zapatuan ze ordutan etorri behar duen plazara. Bertan materiala emango zaie”. Izan ere, hondakinak batzeko plastikoak, eskularruak eta bestelako materialak udalak ipiniko ditu, baina, partaide bakoitzak bere musukoa eroan beharko du, “nagusiek zein txikiek”. Gogoratu dute ekimenak irauten duen denboran osasun neurri guztiak betetzea norberaren erantzukizuna izango dela.
Ingurumena zaintzearen aldeko keinua eginez, elkartasun ekintza honen bidez, Menke-Hennekam gaixotasunaren ikerketara 500 euro bideratuko ditu udalak. Amsterdameko unibertsitatean ari dira ikertzen. Bertan dago Menkeren lantaldea, eta laborategia eta ikerketa taldea Zeelanda Berrian daude. Sindromearen izena berau ikertzen ari diren ikerlarien abizenengatik dauka, Menke eta Hennekam.
Alain Kortabitarte Bilbao 5 urteko aulestiarrari iazko ekainean diagnostikatu zioten Menke-Hennekam sindromea. Euskal Herrian sindrome hori diagnostikatuta daukan bakarra da, eta mundun 70 kasu baino gutxiago daude diagnostikatuta.
