Ondarroako bi kale garbitzaile erasotu dituztela salatu du udalak
Ondarroako Udalak jakitera eman duenez, kale garbitzaileen ibilgailu bat perdigoi bategaz tirokatu dute. "Egilea zein den identifikatzeko" ikerketa nahikoa bideratuta dauka Udaltzaingoak.
Perdigoi erasoa jasan duen kale garbitzaileen ibilgailua. Argazkia: Ondarroako Udala. Gertaera zapatu goizean jazo zela esan dute, udaleko bi kale garbitzaile beraien ohiko jardunean ari zirela. Erasoa, zehazki, 09:30ak aldera gertatu zen, langileek zegozkien garbiketa lanak egiteko ibilgailua Itsasaurren laga zutenean. “Lehenengo, arrautzak bota zizkieten inguruko etxeren batetik, gero, margo gorria eta, azkenik, perdigoi tiro bat. Tiro egin zutenean, zorionez, bi langileak ez zeuden ibilgailu barruan”. Perdigoi tiroak ibilgailuaren atzeko kristala hautsi zuela argitu dute.
Bi langileek ez dutela minik jasan eta ondo daudela azpimarratu du Zunbeltz Bedialauneta Ibaibarriaga alkateak. “Udalak irmoki salatzen du gertatutakoa eta babes guztia adierazten die langileei”.Gertaera jaso zen unetik “egilea zein den identifikatzeko” lanean ari da Udaltzaingoa. Tiroa nork egin zuen ikertzen eta horri buruzko informazioa batzen aritu dira orduz geroztik.
Kale garbitzaileen ibilgailutik jasotako perdigoia. Argazkia: Ondarroako Udala.
Esan dutenez, dagoeneko ikerketa nahikoa bideratuta daukate. “5,5 kalibreko perdigoia da. 4.2 kategoriako arma batetik bota da tiroa eta uste dugu arma bera zelakoa den ere badakigula. Informazio guztia bildutakoan Eusko Jaurlaritzari helaraziko dio Udaltzaingoak gertatutakoari buruzko txostena, beharrezkoak diren neurriak hartu ditzaten”.
Ondarroan indarrean dagoen ordenantzan oinarrituta, tiro egin zuen pertsonak 10.000 eurotik gorako isun bati aurre egin beharko dio, “etxetik bide publikora tiro egin eta ondasun publiko batean kalteak eragin eta denbora tarte batez erabilgarri ez egotea eragiteagatik”. Esan dutenez, Eusko Jaurlaritzak dauka azken hitza erabaki hori hartzerako orduan.
Kale garbitzaileen ibilgailuari jaurtitako margo gorria. Argazkia: Ondarroako Udala.
Ondarroako armei buruzko udal ordenantza berria urtarrileko osoko bilkuran onartu zuten; dokumentuari onarpena aho batez eman zioten udalbatza osatzen duten bi taldeek. “Ez dira asko ordenantza hau daukaten udalerriak, eta are gutxiago Ondarroaren tamainako herriak. Guk garrantzitsua ikusten genuen ordenantza hau sortzea, batez ere, azken aldian eman diren airsoft eta armekin aritzeko antzeko beste jarduera batzuen gorakada ikusita. Helburua arma horiek guztiak kontrolpean izatea da”.
