Bizkaiko txapeldunak erabakiko dira Dzanga Kayaksurf Txapelketan
Domekan [maiatzak 9] Karraspion jokatuko duten txapelketa Euskadiko Koparen 1. proba ere izango da. Bost kategoriatan banatuta, 40 bat parte hartzaile ariko dira lehian.
Parte hartzaile bat III. Dzanga Kayak Surf txapelketako olatu bat hartzen. Argazkia: Dzanga IV. Dzanga Kayaksurf Txapelketa jokatuko dute domekan [maiatzak 9] Mendexako Karraspio hondartzan. Bizkaiko Txapelketa egongo da jokoan, eta horrez gain, Euskadiko Koparen 1. proba ere izango da. Aipatu koparen gainontzeko probak Sopelanan, Bakion, Zarautzen eta Donostiako Zurriolan egitea aurreikusita dago.
09:00etan hasiko dira lanean domekan [maiatzak 9], eta 15:30ak bitartean 23 txanda egingo dituzte: “Tarte horretan gelditu gabe egon beharko dugu, jende asko egongo garelako, manga dezente egongo dira”.
Bost kategoria egongo dira. Kategoria nagusia den OPENaz (18 urtetik gorakoena) gain, junior, kadete, master (40 urtetik gorakoak) eta grand master (50 urtetik gorakoak) kategorietan banatuta, guztira, 40 bat parte hartzaile egongo dira txapelketan.
Apirilaren azken asteburuan lehiatzekoak ziren txapelketa, eta itsasoaren baldintzengatik bertan behera utzi zuten, olatu gutxi zeudelako, baina, oraingoan aurreikuspenak onak dira, eta beraz, baldintza egokiak egotea espero dute: “Olatuak ematen dituzte, eta espero dugu aurreikuspena horrela mantentzea. Baldintza nahiko onak daude, itsasoak indarra daukala jartzen du eta nahikoa ordenatua egongo dela dirudi, periodoa –olatuak zenbatero etortzen diren–nahikoa altua da”.
Antolatzaileek babesleei eskerrak eman dizkiete, eta herritarrei Karraspiotik pasatzeko gonbidapena luzatu dute: “Asko joaten dira Karraspiorantz paseatzera eta jendea animatu dadila ikustera”.
