Lekeitio ere Lea Ibilbidean sartu da
Lekeitioko Udalaren zein Lea Ibarraren asmoa kolaborazioa sendotzea da. Lekeitiok Lea Ibilbidearen mantenuan eta promozioan parte hartuko du.
Lekeitiok Lea ibilbidean parte hartzeko hitzarmena sinatu du aste honetan. Horren bidez, bere eskaintza turistikoa handituko du. Lea Ibilbidea Mendexa, Amoroto, Gizaburuaga, Aulesti eta Munitibar herrien artean sortu zuten 2004. urtean, eta azpiegitura hori lekeitiar askok erabiltzen dutela eta baliabide turistiko paregabea dela ikusita, Lekeitio ere Lea Ibilbidearen barnean sartzea erabaki du udalak.
Aste honetan sinatutako hitzarmenaren bidez, Lekeitiok Lea Ibilbidearen mantenuan eta promozioan parte hartuko du. “Lekeitioko Udalaren zein Lea Ibarraren asmoa kolaborazioa sendotzea da, era horretan Lekeitioko Udalak bere ekarpena egin ahal izateko azpiegitura horren mantentze eta sustapenean. Horretarako Lekeitioko Udalak diru ekarpena egingo du”, azaldu dute.
Jakitera eman dutenez, iazko modura, aurten ere, bidegorriaren egokitze lanak egingo dira, ibilbidea prest edukitzeko. Lan horrek egiteko, tokiko enplegua sustatzeko Lanbideko programa bat jarraitzen dute. “Leartibai Garapen Agentzia eta eskualdeko udalak elkarlanean bideratzen duten enplegu planaren barnean dago bidegorriaren mantentzea eta edertzea. Lan hauek egiteko irizpide zehatz batzuk jarraitu behar dira: besteak beste %30 DBE kobratzen dutenak izan behar dira beharginak, %40 emakumezkoak, 55 urtetik gorakoak %15 eta gainontzekoak Lanbidek zehazten dituen kolektiboetakoak”.
Bestalde, uda honetan ere Marierrota irekiko dutela aipatu dute, eta bertan bidegorriaren inguruko azalpenak ematen dituen interpretazio zentroa aurkituko dut bisitariek. Era berean, uda garaian baita ere, Arraguak kultur ekintza txikiak antolatuko dituela aurreratu dute, “espazio kultural berri bat gehituz Lekeitioko eskaintzara”.