Ispasterko Udalak irisgarritasuna hobetzeko lanak egin ditu herrigunean
Errepide nagusian 30ekoa da gehienezko abiadura, eta udaletxe, frontoi eta eskola inguruan 20koa. Kortazar auzotik errepide nagusirako tartean ezin dira ibilgailuak aparkatu.
Hiri Adeitsuak ekimenetik eta Eskolako Guraso Elkartetik jasotako eskaerei erantzunez, Ispasterko Udalak Eleizaldeko irisgarritasuna hobetzeko lanak egin berri ditu. Gehienezko abiadura adierazten duten seinaleak ipini dituzte, bai eta aparkatzea debekatzen duten marra horiak ere. “Ez bakarrik Hiri Adeitsuetatik, Ispasterko Eskolako Guraso Elkartetik ere eskaera bat jaso genuen, hemengo irisgarritasuna udalak kontutan hartzeko. Kontutan izanda hemen eskola daukagula, eta ume asko ibiltzen dela inguru honetan. Batik bat seinaleztapena egokitu dugu, bai kotxeeen abiadura murrizteko eta aparkalekuak mugatzeko”, azaldu du Garbiñe Saenz de Buruaga Ispasterko alkateak.
Errepide nagusian 30ekoa da gehienezko abiadura, eta udaletxe, frontoi eta eskola inguruan 20koa. Kortazar auzotik errepide nagusirako tartean, errepidearen albo bietan, margotu dute aparkatzea debekatuta dagoela adierazten duen marra horia. “Eskola aurrean aparkatzen zuten lehen, eta orain ezin dute. Ez dago aparkaleku arazorik Ispasterren, tokia badago aparkatzeko, gertatzen zaiguna da ohituta gaudela taberna ondoan kotxea iztera”, dio alkateak. Zentzu horretan, herritarrei kontzientziatzeko eskatzen dietela gaineratu du: “Eta denok ezagutzen ditugun zirkulazio kodeak errespetatzea eskatzen dugu. Ezin bada aparkatu, ezin da aparkatu”.
2017an hasi ziren Hiri Adeitsuen proiektuagaz. Diagnostikoa egin zuten eta han jasotako ondorioekin Ekintza Plana osatu zuten. Eta beraz, orain, bertan zehaztutako ekintzak egiten ari dira: “Pandemiagatik eten bat eduki genuen, baina iazko urritik aurrera martxan hasita gaude. Ekintza Plan hori berrikusten ari gara; hilean eguen batean batzen gara. Aurten egiteko moduan zeintzuk ekintza dauden ikusten gabiltza”.
Hain zuzen ere, azken lan horiekin herriguneko irisgarritasuna hobetzeaz gain, hainbat auzotan jarlekuak ipini dituzte.
Epe laburrera zein epe luzera egin beharreko ekintzak dauzkate planean.
Argazkia: Ispasterko Udala.
