Haimar Etxeberriak irabazi du 39. Aitxekutz Saria
Eskualdeko lehenengoaren saria Aurrera Txirrindulari Elkarteko Mikel Arrasate lekeitiarrak irabazi du. Berriatuko Txirrindulari Elkartearen kideek balorazio “oso ona” egin dute.
Argazkia: Martin Early. Zapatu arratsaldean lehiatu zuten Berriatuko 39. Aitxekutz Saria. 20. Juan Luis Kanterape Memoriala, eta Buruntzazpi taldeko Haimar Etxeberria sartu zen lehenengo helmugan. Lasterketaren irabazleak bi ordu, 27 minutu eta 33 segundotan burutu zuen 100 bat kilometroko ibilbidea. Etxeberriarengandik 37 segundora helmugaratu ziren Xabier Aransolo (Nabiga 360) eta Galder Bengoetxea (Omar Fraile/Galdakauto).
Argazkia: Berriatuko Txirrindulari Elkartea.
46 txirrindularik amaitu zuten proba, tartean egon ziren Lea-Artibaiko hainbat txirrindulari. Eskualdeko lehenengoaren saria Aurrera Txirrindulari Elkarteko Mikel Arrasate lekeitiarrak irabazi zuen.
Lehenengo buelta denek batera eman zuten. Gero, Alex Aguerok ihesaldia abiatu zuen, eta Arrasate batu zitzaion. Bigarren bueltan horiek ihes egin zuten, baina ezin izan zioten eutsi. Mendexako azkenengo igoeran apurtu zen lasterketa; Etxeberriak ihes egin zuen, eta atzetik segitu zioten Aransolok, Bengoetxeak eta Xabier Zabalak.
Mendiko Saria Aransolorentzat izan zen, eta tarteko helmugaren sailkapenean, berriz, Eneko Apodaka sailkatu zen lehen postuan. Klube arteko sailkapenean, Iridoi-Alimco-Belabia MOT nagusitu zen.
Argazkia: Berriatuko Txirrindulari Elkartea.
Berriatuko Txirrindulari Elkartearen kideek balorazio “oso ona” egin dute: “Antolakuntza aldetik dena ondo joan zen. Bestalde, txirrindulari batzuk erori eta min hartu zuten. Jendeak burbuilak errespetatu zituen, eta eguraldiak lagundu zigunez, sari banaketa ekitaldia Cikautxon egin genuen”. Aurten helmuga Bustinzuri kalera lekualdatu zuten, eta hartutako erabakia egokia izan dela uste dute: “Momentuz gustatu zaigu, eta ondo funtzionatu du”. Horrez gain, lasterketan laguntzen aritu ziren boluntarioei eskerrak eman dizkiete, “eurei esker lasterketa antolatzea posible dutelako”.
