Isuntzako mutil gazteak, Euskadiko Txapeldun
Bizkaiko Trainerilla Txapelketan bandera lortu ostean, Euskadikoa ere lortu du Lekeitioko arraun elkarteko gazte mailako gizonezkoen taldeak. Maila berean, brontzezko domina irabazi dute emakumezkoek. Bestalde, Ondarroa absolutu mailako nesken finalean laugarren sailkatu da.
Argazkia: Isuntza. Bizkaiko Trainerilla Txapelketan emaitza bikainak lortu zituzten Isuntzakoek, eta asteburu honetan Legution lehiatutako Euskadiko Trainerilla Txapelketan ere ez dira atzean geratu. Gazte mailan, gizonezkoen taldea txapeldun geratu da, eta emakumezkoena hirugarren sailkatu da.
Hala, Bizkaiko eta Euskadiko txapeldun dira Isuntzako mutil gazteak. Atzoko finalean, hamalau minutu, 36 segundo eta 75 ehuneneko markagaz irabazi zuten Euskadiko bandera. Hamar segundo eta 33 ehunen atera zieten San Juanekoei, eta Santurtzikoak izan ziren hirugarrenak, txapeldunengandik hamahiru segundo eta 53 ehunenera sailkatuta. Zumaia podiumetik kanpo geratu zen, 14:41,83 denbora eginda.
Kategoria bereko emakumezkoen finalean Kaikuk, Hibaikak eta Isuntzak osatu zuten podiuma, eta Deustu sailkatu zen laugarren. Mutiletan modura, nesketan ere lehia oso estua egon zen. 42 ehuneneko tartea egon zen lehenengo bien artean; 15.57,97 egin zuen Kaikuk, eta irabazlearengandik 33 segundo eta 95 ehunenera sailkatu zen talde lekeitiarra.
Seniorretan, emakumezkoetan Kaiarriba (Donostiarra) eta gizonezkoetan Santurtzi dira aurtengo txapeldunak. Ondarroa emakumeetan eta Isuntza gizonetan laugarren geratu dira.
Gazte mailan bezala, absolutuetan ere tarte oso estuak egon ziren atzo. Hamabost minutu, zortzi segundo eta hamazortzi ehunenetan amaitu zuten estropada Kaiarribakoek. Lau segundo eta 80 ehunenera sailkatu ziren oriotarrak. Deustuk lortu zuen brontzezko domina, txapeldunarengandik zortzi segundo eta 84 ehunenera. Ondarroak, berriz, irabazlearengandik minutu bat, 58 segundo eta 64 ehunenera amaitu zuen.
Gizonezkoen finalean lau talde bizkaitarren arteko lehia estua egon zen, eta Bizkaiko txapelketan modura, Santurtzikoek eroan zuten bandera eta Zierbenakoek zilarrezko dominak. 13.12,73 denboran burutu zituen lanak Santurtzik. Hamahiru segundo eta 90 ehunen atera zizkion txapeldunordeari, eta Bermeo izan zen hirugarrena, Santurtzirengandik hamabost segundo eta 42 ehunenera sailkatuta. Isuntzakoek hamahiru minutu, 38 segundo eta 77 ehunenetan egin zuten estropada.
