Senior mailan bosgarren sailkatu da gizonezkoen taldea. Kategoria horretan June Aranbarri eta Mikel Azkarate ondarrutarrak dauden Santurtzik eta Donostiarrak irabazi dituzte banderak.
Argazkia: Isuntza. Asteburuan Castro Urdialesek jokatu da Espainiako Trainerilla Txapelketa, eta Isuntzako mutil gazteek brontzezko domina irabazi dute. Klub lekeitiarretik gizonezko seniorrek ere parte hartu dute, eta horiek bosgarren sailkatu ziren domekako [maiatzak 30] finalean.
14.56,41 denboran amaitu zuten estropada domekan [maiatzak 30] Isuntzako gazteek. Galiziako Club Do Mar Bueu izan zen finaleko azkarrena: 14.52,55. Eta zilarrezko domina ere galiziarrentzat izan zen; 14.55,99 denbora eginda, Cabokoak geratu ziren txapeldunorde.
Gazte mailan ez zen emakumezkoen kategoriarik egon, bai, ordea, absolutuetan. Gizonezkoetan Itsasoko Ama eta emakumezkoetan Kaiarriba izan ziren onenak. June Aranbarri eta Mikel Azkarate ondarrutarrak daude talde horietan.
Gizonezkoetan, podiumetik kanpo geratu zen Isuntza Arraun Elkartea. Hamahiru minutu, 58 segundo eta ehunen bakarrean burutu zuten estropada lekeitiarrek, eta bosgarren sailkatu ziren. Zazpi bat segundoko aldea egon zen lehenengo bien artean. Santurtzik 13.33,22 denbora egin zuen, eta Zierbenak, berriz, 13.40,72.Cabo klub galiziarrak osatu zuen podiuma (13.48,77).
Emakumezkoen finalean ere bi klub euskaldun geratu ziren txapeldun eta txapeldunorde. Hamabost minutu, 27 segundo eta 76 ehuneneko marka egin zuten Donostiarraren neskek. Deusturentzat izan zen zilarrezko domina (15.31,26), eta brontzezkoa, berriz, Cabok lortu zuen.
