Uda kulturalerako laguntzaile bila ari dira Lekeition
Laguntzaile talde bat osatu nahi dute udako ekintzetarako zein Kalekarako. Ekainaren 13ra arte egongo da izen-emate epea zabalik.
Argazkia: Kaleka Uda honetan Lekeition antolatuko dituzten kontzertu eta ikuskizunetarako laguntzaile bila ari da udala. Laguntzaile talde bat osatu nahi dutela jakitera eman dute bai udako ekitaldietarako zein uztailaren 9tik 11ra ospatuko den Kaleka Lekeitioko Nazioarteko Kale Arteen jaialdirako. Ekintza guzti horiek antolatzea eta babes neurriak egoki betetzea izango da laguntzaileen ardura.
Laguntzaile bezala aritzeko bi ezaugarri bete beharko dira, 18 urte baino gehiago izatea eta kultur arloa ezagutzeko gogotsu egotea. Izen-ematea Lekeitioko Udalaren web orrialdean eta sare sozialetan agertuko den estekaren bidez egin ahalko da. Laguntzaileek lan egiten duten egun bakoitzeko dietak jasoko dituzte.
“Kalekako laguntzaile programan parte hartzea jendea ezagutzeko, gaur eguneko sorkuntzaren munduan barneratzeko eta esperientzia profesionala jasotzeko aukera paregabea da” , esan dute jaialdiaren antolatzaileek.
Egin beharreko lanak ondorengoak izango direla aurreratu dute:
- Gonbidatutako konpainiei laguntza ematea
- Espazioen prestaketa
- Parte hartzaile / publikoen kudeaketa
- Muntaketan laguntasuna eman eta materialen zaintza
- Ekintzetan laguntasuna ematea
- Jaialdiari buruzko informazioa ematea
Ekainaren 13ra arte egongo da laguntzaile modura izena emateko aukera zabalik.
