Lekeitioko Usotegin apurketak eragin dituztela salatu du Lekitto Bedarrak
Taldekoek esan dute "sarritan" egoera berdinaren aurrean aurkitzen direla. "Nahikoa desanimatuta gaude gazteen jarreragaz". Udalari ere laguntza eskatu diote.
Egurrak botata, harriak mugituta, iturria apurtuta, 5-7 kilo inguruko bost sandia apurtuta, zikinkeria nonnahi… Horrelaxe aurkitu dute gaur [irailak 17] Lekitto Bedarra Lekeitioko ortularien elkartekoek Usotegi parkea. Esan dutenez, bizilagun batek esan die 12-14 urteko gazte kuadrilla batek sortu dituela kalte horiek guztiak. “Esan digute jolasorduan Usotegiko ortu barruan egoten direla, eta nahiz eta ohartarazi, ez dutela kasurik egiten”, gaineratu dute Lekitto Bedarrekoek.
Duela hilabete batzuk ere antzeko gertaera bategaz topatu ziren Lekitto Bedarrekoak. Orduan, baina, gazteekin egon eta taldeak ze lan egiten duen azaldu eta mesedez kalterik ez egiteko eskatu zieten. “Elkarlanerako gonbitea ere egin genien. Nahi bazuten ortuko lerro batean zer edo zer landatu ere horretarako prest geundela esan genien. Baina horrek guztiak ez du balio izan”. Izan ere, diotenez “sarritan” egoera berdinaren aurrean aurkitzen dira. “Nahikoa desanimatuta gaude euren jarreragaz”. Horren guztiaren aurrean, udalari ere laguntza eskatu diote.
Horrez gain, ustez apurketak eragin dituzten gazteei ere ohar bat utzi diete taldekoek (beheko argazkian):
Lekitto Bedarrekoek ustez apurketak eragin dituztenei parkean utzi dieten mezua. Argazkia: Lekitto Bedarra.
