Martxan dago 14. Lea-Artibaiko Enpresa Proiektu Lehiaketa
Negozio ideia berritzaileak; merkataritza, ostalaritza, turismo eta zerbitzu enpresak eta proiektu kooperatibo onena sarituko dituzte. Proiektuak aurkezteko epea irailaren 28an amaituko da.
Azaro Fundazioa eta Leartibai Garapen Agentzia-Behargintza enplegu eta tokiko garapenerako zentroak aurten berriro jarri du martxan 14. Lea-Artibaiko Enpresa Proiektuen Lehiaketa. Pandemia dela eta iaz lehiaketa bertan behera geratu zenez, aurtengo lehiaketara 2019 eta 2020 urtean Lea-Artibain enpresa berri bat martxan jarrita edo 2021ean martxan jartzeko asmoa duten ekintzaile guztiak aurkeztu daitezke. Enpresa proiektu kooperatiboei dagokionez, Lea-Artibain kokaturikoez gain, Busturialdea, Durangaldea eta Debabarrenan kokatutakoak ere aurkeztu ahalko direla zehaztu dute antolatzaileek.
Proiektuak aurkezteko azken eguna irailaren 28a izango da. Sari banaketa, berriz, urriaren 2an egingo da Markina-Xemeinen ospatuko den Lea-Artibaiko Pertsona Ekintzailearen Egunaren baitan antolatuko diren ekimenekin batera.
Hiru sari banatuko dituzte: Negozio ideia berritzaileena, 2.000 euroko sariagaz; Merkataritza, ostalaritza, turismo eta zerbitzu enpresa ideiarik onena, 1.500 euroko sariagaz eta kooperatiba izaera juridikoa duten enpresak aurkeztutako proiektu onena, bere jarduera edozein izanik ere. Horrez gain, saria eskuratzen duten ekintzaileek Lea-Artibai Berrikuntza Gunean dagoen enpresa-haztegian kokatzeko erraztasunak izango dituztela azaldu dute antolatzaileek, eta erakunde antolatzaileek kudeatzen dituzten programa ezberdinetan parte hatzeko aukera ere edukiko dute. “Gainera, enpresa martxan jarri bitartean eta ondorengo urteetan aholkularitza eta laguntza jasoko dute”.
Aurten, lehen aldiz, gainera, herritarrentzako saria ere egongo da. Bertoko produktuekin osatutako Hamen Bertokoa otzara bat jaso ahal izango dute, ekimen hau sare sozialen bidez komunikatzen eta zabaltzen parte hartzen dutenek: “bi erakunde antolatzaileek lehiaketari buruz argitaratzen dituzten argitalpenak komentatuz, edota Lea-Artibaiko Pertsona Ekintzailearen Egunerako programatutako ekimenen harira herritarrek bere sare sozialetara igo ahal izango dituen argitalpenetan Azaro eta Leartibai –bi erakundeak– aipatzen badituzte”.
Lehiaketan parte hartzeko interesa duten guztiek Azaro Fundazioa eta Leartibai Garapen Agentzia-Behargintzaren webguneetan dituzte eskura izen emate orria eta lehiaketaren oinarriak.
